Սյունիքի մարզպետ Սուրեն Խաչատրյանին (Լիսկա) մի քանի հարց ենք ուղղել:
– Պարոն Խաչատրյան, նախօրեին մեր խմբագրություն էին զանգահարել Կապանից հինգ կմ հեռավորության վրա գտնվող Շահումյան բանավանի բնակիչները և ասում էին, որ կիրակի օրը Dino Gold Mining ընկերությունը պատրաստվում է բուլդոզերով քանդել իրենց տները: Բնակիչները խնդրում են` գոնե ձմռանն իրենց տներից չհանեն: Արդյոք տեղյա՞կ եք ընկերության այս մտադրության մասին, և որպես մարզպետ` ի՞նչ կձեռնարկեք:
– Ես այդ գործին ոչ միայն տեղյակ եմ, այլև անմիջականորեն մասնակցել եմ պայմանագրերի կնքմանը: Ընկերության նախկին տնօրինությունը ճգնաժամային տարիներին չէր ուզում պայմանագրերը կապել, ես նրանց հետ խոսեցի, ստիպեցինք` պայմանագրերը կապեցին, և տեղի ժողովրդին բավականին նորմալ գներով (կարելի է ասել` մեծամասամբ ապօրինի գույք ունեին, ոմանք գրանցում չունեին, սեփականության վկայական չունեին) Dino Gold Mining ընկերությունը բարեխղճորեն բոլորի դիմաց վճարեց:
– Իսկ տեղյա՞կ եք` վերջին ժամկետը ե՞րբ է, ասում են կիրակի քանդելու են: Կարո՞ղ եք ընկերության հետ պայմանավորվել, որ մինչև մայիս բնակիչներին չտարհանեն:
– Թող իրենք վաղը գան ինձ մոտ, հիմա կհանձնարարեմ` իրենց կանչեմ, իրենց հետ խոսենք, տեսնենք` ինչ է հնարավոր անել, բայց իրենց գումարները ստացել են, չկա այդպիսի մարդ, որ իր գումարը ստացած չլինի: Ես վաղը երկու կողմերին էլ կկանչեմ, և տեղում հարցը կլուծենք: Նրանք էլ այդ տարածքի վրա մեծ գումարներ են ծախսում, այդքան էլ հեշտ աշխատանքներ չեն:
– Պարոն Խաչատրյան, մամուլում Ձեր պաշտոնի փոփոխության մասին խոսակցությունները շարունակվում են, հնարավո՞ր է այլ պաշտոնի տեղափոխվեք:
– Ես ոչ մի տեղ էլ չեմ տեղափոխվելու, իմ գործը շարունակում եմ, և այդպիսի խնդիր էլ չունենք:
– Իսկ տեղում այլ կուսակցությունների հետ հարաբերությունները արդյոք սրվա՞ծ չեն, հատկապես Բարգավաճ Հայաստան կուսակցության հետ:
– Սյունիքում բոլոր կուսակցությունների հետ հարաբերությունները նորմալ են: Սյունիքում բոլոր կուսակցությունների անդամները` Հանրապետական, Բարգավաճ և մնացած կուսակցության անդամները, ինձ համար առաջին հերթին սյունեցի են, հետո նոր կուսակցական, և ուզում եմ իմանաս, որ բոլոր կուսակցության անդամների հետ առաջին հերթին որպես սյունեցի շատ ջերմ, շատ բարեկամական հարաբերությունների մեջ եմ:
– Պարոն Խաչատրյան, գործարար Սիլվա Համբարձումյանի հարցը հնարավոր է փակվի՞, ի՞նչ ընթացքի մեջ է:
– Ես չգիտեմ` ինչ ընթացքի մեջ է, միայն գիտեմ, որ սա հերյուրանք է: Հիմա իմ տեղը հարմար չէ, ես չեմ կարող այդ հարցերին այդքան պատասխանել:
– Իսկ գումարը չե՞ն պահանջում Ձեզնից:
– Ի՞նչ գումար:
– 102 միլիոնը, գործարար կնոջ սարքի արժեքը:
– Ես այդ հարցի հետ որևէ առնչություն չունեմ: