Այսօրվա նիստում կառավարությունը նախատեսում է որոշում ընդունել Ֆրանսիայի Մարսել քաղաքում ՀՀ գլխավոր հյուպատոսություն բացելու մասին` հյուպատոսական շրջանում ընդգրկելով Պրովանս-Ալպ-Կոտ դ’Ազյուր, Լանգեդոկ-Ռուսիյոն, Միդի-Պիրենեյ տարածաշրջանները և Կորսիկան:
Ֆրանսիայում բնակվում է շուրջ 500 հազար հայ: Նրանց զգալի մասը Ֆրանսիայի Հանրապետության ազգությամբ հայ քաղաքացիներ են, սակայն ՀՀ անկախությունից հետո ստվար թիվ են կազմում նաև Ֆրանսիայում կա՛մ ժամանակավոր, կա՛մ մշտական բնակություն ունեցող, ինչպես նաև իրավական կարգավիճակ չունեցող՝ Հայաստանի Հանրապետության քաղաքացիները:
Ֆրանսահայ համայնքը կենտրոնացած է հիմնականում Փարիզյան (հյուսիս), Ռոն Ալպյան և Պրովանս-Ալպ-Կոտ-դ’Ազյուրի (հարավ-արևելք) շրջաններում, ընդ որում` Պրովանս-Ալպ-Կոտ-դ’Ազյուրի շրջանում բնակվում է Ֆրանսիայի ամենաստվար հայ համայնքը, իսկ շրջանի կենտրոն հանդիսացող Մարսել քաղաքում հայերի թիվը հասնում է մոտ 100 հազարի:
Փարիզում ՀՀ դեսպանության հյուպատոսական ծառայության աշխատանքն ընթանում է խիստ ծանրաբեռնված օրակարգով: Բացի այդ, Փարիզից մեծ հեռավորության վրա բնակվող անձանց համար, որոնց անմիջական ներկայությունը հյուպատոսությունում, հայցադիմումների բնույթից ելնելով, պարտադիր է համարվում, դժվարություններ են առաջանում՝ երկար ճանապարհների հետ կապված (Մարսելից Փարիզ հեռավորությունը մոտ 800 կմ է):
Հաճախակի են հայ համայնքային շրջանակներից առաջարկները, որ նման մեծաքանակ հայկական համայնքի առկայության պարագայում ցանկալի և նպատակահարմար է ՀՀ գլխավոր հյուպատոսություն հիմնել Ֆրանսիայի հարավ-արևելյան շրջանում, մասնավորապես` Մարսել քաղաքում:
