Հայ ազգային կոնգրեսի ներկայացուցիչ Դավիթ Մաթևոսյանը «Ազատություն» ռադիոկայանի հետ զրույցում ասել է, թե Հանրապետական կուսակցությունը, շտաբի նիստ անցկացնելով, խախտել է օրենքը։
«Եթե իրոք նրանք ազատ, անկախ ընտրություններ անցկացնելու մղումով էին թողնում պետական պաշտոնները, ապա դա պետք է անեին այն ժամանակ, երբ օրենսդրությամբ սահմանված կարգով նշանակվում է ընտրության օրը: Միայն այդ օրվանից է թույլատրված բացել ընտրական շտաբեր», – ասել է Կոնգրեսի ներկայացուցիչը:
Հիշեցնենք, որ նոյեմբերի 29-ին Հանրապետական կուսակցության կենտրոնական գրասենյակում տեղի է ունեցել հավաք, որն, ըստ մասնակիցների եղել է աշխատանքային հանդիպում, և ոչ թե՝ շտաբի նիստ։
Հավաքին մասնակցել են Հովիկ Աբրահամյանը, ով ՀՀԿ-ի նախընտրական շտաբը ղեկավարելու պատճառաբանությամբ հրաժարական տվեց Ազգային ժողովի նախագահի պաշտոնից, նախագահ Սերժ Սարգսյանի աշխատակազմի ղեկավարի նախկին տեղակալ Միքայել Մինասյանը, փոխվարչապետ Արմեն Գևորգյանը, Ազգային ժողովի պետաիրավական հարցերի մշտական հանձնաժողովի ղեկավար Դավիթ Հարությունյանը:
Ընտրական օրենսգրքի համաձայն, թեկնածուները, կուսակցությունները շտաբեր կազմավորելու իրավունք ունեն միայն այն բանից հետո, երբ նշանակվեն ընտրությունները։
Հանրապետականները պնդում են, որ իրենք օրենքը չեն խախտել և անցկացրել են ոչ թե նախընտրական շտաբի հավաք, այլ կուսակցության շտաբի նիստ:
Մեկնաբանելով այս փաստը՝ Կենտրոնական ընտրական հանձնաժողովի անդամ Սիլվա Մարկոսյանն ասել է. «Որևէ տեղ նախընտրական շտաբ չկա ձևավորված: Օրենքով միանշանակ կարգավորված է, որ նախընտրական շտաբեր ձևավորվում են ընտրությունները նշանակելուց հետո»։