«Ամեն ինչին սուր տեսակետից նայելը հաճախ այդ սուրը մարդկանց դեմ է ուղղում: Սյունիքի մարզպետը վերջին 20 տարիների ընթացքում ՀՀ կառուցողական պաշտպանական, քաղաքական, տնտեսական գործունեություն իրականացնող ակտիվ մարդկանցից մեկն է»,- այսօր ԵՄ կազմակերպած միջոցառման ժամանակ հայտարարեց Գորիսի քաղաքապետ Նելսոն Ոսկանյանը՝ պատասխանելով այն դիտարկմանը, որ ծնունդով գորիսեցի Սյունիքի մարզպետ Սուրեն Խաչատրյանը ավելի շատ է աջակցում Գորիս քաղաքին, քան՝ Սիսիանին: Ընդ որում՝ Գորիսի ղեկավարությունը Ս.Խաչատրյանի համակուսակիցներն են (ՀՀԿ), իսկ Սիսիանինը՝ ԲՀԿ-ական են:
Ն. Ոսկանյանը նշեց, որ մարզպետը Գորիսի առաջին ղեկավարներից մեկն է եղել և քաղաքի 15-ամյակին ոսկե մեդալ է ստացել: Ըստ նրա՝ Գորիսի քաղաքապետարանն աշխատում է մարզպետարանի տարբեր բաժինների հետ, և այդ ակտիվ կապը հաճախ ավելի շատ պարտականություններ է դնում իրենց վրա, որովհետև «հարաբերություններն ինչքան ակտիվ են, այնքան շատ գործ է արվում, քան տեղում նստելով»:
«Քաղաքական տեսակետից՝ եթե ինքը եղել է Գորիսի քաղաքապետ ու հիմնել է «Գորիս» բարեգործական ընկերությունը, այսօր ինքը Սյունիքի մարզպետն է ու հիմնել է «Սյունիք» բարեգործական հասարակաքաղաքական ընկերությունը: Շրջանակները մեծանում են, ազդեցությունը բոլորի նկատմամբ հավասար է: Ստեղ արդեն հարաբերությունները կախված են տվյալ 2 սուբյեկտից»,- ասաց Գորիսի քաղաքապետը:
