Այսօր «Ժառանգություն» խմբակցության ղեկավար Ստյոպա Սաֆարյանը պաշտոնական նամակով դիմել է ՀՀ վարչապետ Տիգրան Սարգսյանին` խնդրելով տեղեկացնել, թե ինչ ընթացք է տրվել ՀՀ Ազգային ժողովի «Ժառանգություն», «Հայ Յեղափոխական Դաշնակցություն», «Օրինաց Երկիր» և «Բարգավաճ Հայաստան» խմբակցությունների` ձկնաբուծության ոլորտի հրատապ խնդիրներին վերաբերող համատեղ գրությանը, որը կառավարություն էր ուղարկվել ս.թ. նոյեմբերի 29-ին:
Հիշեցնենք, որ Ազգային ժողովի չորս խմբակցությունները՝ «Ժառանգություն», «Հայ Յեղափոխական Դաշնակցություն», «Օրինաց Երկիր» և «Բարգավաճ Հայաստան», նոյեմբերի 29-ի վերոհիշյալ գրությամբ ՀՀ վարչապետին առաջարկել են.
1. Ժամանակավորապես դադարեցնել ձկնաբուծության ոլորտում իրավասու մարմինների կողմից իրականացվող ստուգումները, քանի որ ՀՀ Ազգային ժողովի օրակարգում են ոլորտը կարգավորող ՀՀ օրենքների երեք նախագծեր, ինչպես նաև` դեկտեմբեր ամսվա ընթացքում նախատեսված են խորհրդարանական լսումներ:
2. Միաժամանակ կազմակերպել ոլորտի շահագրգիռ կողմերի, պետական մարմինների և ԱԺ խմբակցությունների մասնակցությամբ համատեղ քննարկում, որի ժամանակ դիտարկել հողերի կատեգորիաների նշանակության փոփոխման, ջրօգտագործման ծավալների չափագրման տեսակի ընտրման, ջրահեռացման և ոլորտի զարգացման վերաբերյալ խնդիրները: