Ճիշտ չի լինի ասել, որ «Բարգավաճ Հայաստան» կուսակցության հանդեպ ճնշումներն ակնհայտ են, սակայն նման երևույթներ նկատելի են. «Առաջին լրատվական»-ի հետ զրույցում այս մասին հայտնեց ԲՀԿ առաջնորդ Գագիկ Ծառուկյանի մամուլի քարտուղար Խաչիկ Գալստյանը՝ անդրադառնալով ԲՀԿ Ջերմուկի տարածքային կառույցի ղեկավար Արմեն Հովհաննիսյանին թմրանյութեր պահելու կասկածանքով ձերբակալեու փաստին:
«Մենք հետևում ենք իրադարձությունների զարգացմանը, սակայն վերջնական գնահատականներ դրանց վերաբերյալ կտանք ավելի ուշ: Հատուկ գնահատականներ և եզրակացություններ կտրվեն Գագիկ Ծառուկյանի՝ Հայաստան վերադարձից հետո: Երբ նա վերադառնա՝ իրավիճակը նրան կներկայացվի»,- նշեց Խաչիկ Գալստյանը՝ հավելելով, որ ԲՀԿ ղեկավարը Հայաստան կվերադառնա մի քանի օրից:
Անդրադառնալով կալանավորված, «Շլամ» մականունով Արմեն Մուրադյանին, որը «Արարատ ցեմենտ»-ի արտադրանքի հիմնական իրացնողներից է, Գագիկ Ծառուկյանի մամուլի քարտուղարը նկատեց. «Տվյալ անձնավորությունը պաշտոնապես կուսակցության անդամ չէ, նա ԲՀԿ անդամ չէ, և նրա մասին որևէ բան չեմ կարող ասել»:
Նշենք, որ այսօր՝ նոյեմբերի 30-ին, թմրանյութեր պահելու կասկածանքով ձերբակալվել է ԲՀԿ Ջերմուկի տարածքային կառույցի ղեկավար Արմեն Հովհաննիսյանը:
Արմեն Հովհաննիսյանը ձերբակալվել է երեքշաբթի օրը` Քրեական օրենսգրքի 268-րդ հոդվածի երկրորդ մասի հատկանիշներով, խոշոր չափերով թմրամիջոցների ապօրինի շրջանառության համար: