Ռուսաստանի ռազմածովային ուժերի Հյուսիսային նավատորմը, Адмирал Кузнецов ավիակիր հածանավի գլխավորությամբ, դեկտեմբերի սկզբին կտեղափոխվի Սիրիայի Տարտուս նավահանգիստ: Փորձագետները ենթադրում են, որ դա կարող է գնահատվել որպես աջակցություն Ասադի վարչակարգին:
Մոսկվայում Սիրիայի դեսպանատան լիազոր նախարար Սուլեյման Աբու Դիյաբը հայտարարել է, որ ռուսական բազան Սիրիայում գործում է դեռ խորհրդային ժամանակներից, և նավերը կարող են իրենց տարածք տեղափոխվել ցանկացած պահի:
Այնուամենայնիվ, ինչպես հաղորդում է ИТАР-ТАСС-ը՝ վկայակոչելով Ռուսաստանի զինված ուժերի գլխավոր շտաբին, Հյուսիսային նավատորմի նավերը Սիրիայի տարածքային ջրեր կմտնեն դեկտեմբերի վերջին և ոչ թե 2012 թ. գարնանը, ինչպես նախատեսվում էր ավելի վաղ:
BBC-ի ռուսական ծառայությանը տված հարցազրույցում Ռուսաստսնի աշխարհաքաղաքական խնդիրների ակադեմիայի առաջին փոխտնօրեն Կոնստանտին Սիվկովը նշել է, որ ժամկետի փոփոխությունը պայմանավորված է Սիրիայում տիրող իրավիճակի բարդացմամբ:
«Հաշվի առնելով Սիրիայում և Սիրիայի շուրջ ռազմաքաղաքական դրության լարվածությունը, և հաշվի առնելով այն հանգամանքը, որ Սիրիան կարող է դառնալ իրավիճակի լուրջ ապակայունացման աղբյուր ոչ միայն Մերձավոր Արևելքում, այլև Ռուսաստանի Դաշնությանը հարող շրջաններում, նավախումբը կշարժվի այդ տարածաշրջան»,- նշել է Սիվկովը:
Իր հերթին Քաղաքական և ռազմական վերլուծության փոխտնօրեն Ալեքսանդր Խրամչիխչինը կարծում է, որ այդպիսով Ռուսաստանը իր աջակցությունն է հայտնում Սիրիայի նախագահ Բաշար Ալ-Ասադին:
«Ռուսաստանը չի թաքցնում, որ ինքն աջակցում է Ասադին: Իսկ այժմ Ասադը և նրա կողմնակիցները հավելյալ անգամ կիմանան, որ իրենց օգնություն է ցուցաբերվում: Նա, իհարկե, առանց այդ էլ գիտի դրա մասին, սակայն այժմ լրացուցիչ կիմանա: Այդ մասին կիմանան նաև նրա հակառակորդները: Այսինքն՝ ոչ մի նոր բան չի լինի, Սիրիայի իրավիճակի վրա դա ոչ մի կերպ չի անդրադառնա»,- հայտարարել է Խրամչիխչինը BBC-ի ռուսական ծառայությանը տված հարցազրույցի ժամանակ:
Ինչպես հաղորդվում է, Адмирал Кузнецов ավիակիր հածանավիգ բացի, որի վրա գտնվում են Су-33 կործանիչ, Су-25УТГ գրոհային ինքնաթիռ և Ка-27 հակասուզանավային ուղղաթիռներ, դեպի Սիրիա կշարժվի նաև Адмирал Чабаненко հակասուզանավային մեծ նավը:
Դուրս գալով Բարենցի ծոցից՝ նավերը կշրջանցեն Եվրոպան և Ջիբրալթարի նեղուցով կմտնեն Միջերկրական ծով:
Ինչպես հաղորդում է Известия թերթը, նախատեսվում է, որ Միջերկրական ծովում նրանց կմիանա Ладный պարեկային նավը: Բացի հածանավից, կլինեն նաև նրան ուղեկցող 2-3 նավ և, ամենայն հավանականությամբ, սուզանավեր:
Ավելի վաղ հաղորդվում էր, որ Պարսիոց ծոցի շրջանից Սիրիայի ափերին է մոտենում ԱՄՆ ռազմածովային ուժերի George Bush բազմաթիրախ հարվածային ատոմային ավիակիրը:
Հարցազրույցում Սիվկովը նշել է, որ իրենց նավերի մոտեցումը ոչ մի կապ չունի ամերիկյան ավիակրի մոտեցման հետ: Այնուամենայնիվ, վերլուծաբանը նշել է, որ «իրադրության ընդհանուր լարվածություն կա»:
«Սիրիան լուրջ ռազմական ագրեսիայի է ենթարկվում այլ տերությունների կողմից, քանի որ այլ պետությունների տարածքից ահաբեկչական խմբավորումների և զինյալների առաքումը Սիրիա, համապատասխան միջազգային իրավունքի, ռազմական ագրեսիա է Սիրիայի դեմ,- նշել է Սիվկովը:- Իսկ այնտեղ, որտեղ ռազմական հակասություններ են առաջանում, ռազմածովային ուժեր ունեցող բոլոր խոշոր տերությունները տարածաշրջան են ուղարկում իրենց նավերը՝ իրենց քաղաքացիներին ազատելու կամ տարհանելու, ինչպես նաև հումանիտար օգնություն ցուցաբերելու համար»:
Սիվկովը նաև նշել է, որ ռուսական նավերը չեն պատրաստվում միջամտել Սիրիայում տիրող իրավիճակին: