Կոնգրես-ԲՀԿ այս «պատմության» մեջ, որը հասկանալիորեն ողողել է Հայաստանի ներքաղաքական շրջանառությունը, բավական ուշագրավ է ՀՀԿ-ի պահվածքը: Ինչպես հայտնի է, այսինքն՝ ինչպես տեսնում ենք, Հանրապետականը համառորեն խուսափում է Կոնգրեսի առաջնորդ Լևոն Տեր-Պետրոսյանի հայտնի ելույթի հայտնի դրվագին անդրադառնալուց և Կոնգրես-ԲՀԿ հնարավոր համագործակցության, կամ էլ դրա թեկուզ քաղաքագիտական տեսականության մասին խոսելուց:
«Բարգավաճ Հայաստանը» Լևոն Տեր-Պետրոսյանի ելույթից հետո հայտնվել է բավական դժվարին վիճակում: Համընդհանուր կասկած է առաջացել այդ կուսակցության քաղաքական գծի վերաբերյալ: Կուսակցության տեղն է կասկածի տակ հայտնվել քաղաքական և իշխանական դաշտում, իսկ հստակեցնելու հարցում «Բարգավաճ Հայաստանը» կարծես թե անզոր է: Ավելին՝ առկա քննարկումներին ԲՀԿ-ական Նաիրա Զոհրաբյանի արձագանքը, որը, ըստ էության, միակ համակարգային և հայեցակարգային արձագանքը կարելի է համարել ԲՀԿ-ից այս ամբողջ ընթացքում, ակնհայտորեն ցույց է տալիս, որ «Բարգավաճ Հայաստանը» ոչ մի կերպ չի ուզում դառնալ այսօրինակ քննարկումների օբյեկտ, այլ ուզում է, որ իրավիճակը մնա հենց այնպես, ինչպես կար մինչ այժմ:
Խնդիրն այն է, որ ԲՀԿ համար նույնիսկ շատ ավելի շահեկան են քննարկումները ՀՀԿ հետ նոր, ամենասուր հակասությունների, Գագիկ Ծառուկյանի և Սերժ Սարգսյանի հակադրության վերաբերյալ, քան Կոնգրեսի հետ հնարավոր գործակցության մասին բանավեճերն ու դիտարկումները: Բանն այն է, որ Կոնգրես-ԲՀԿ հեռանկարը իսկապես քանդում է ամբողջ քաղաքական և իշխանական դաշտը՝ ի տարբերություն ՀՀԿ-ԲՀԿ ամենասուր վեճի անգամ, քանի որ մի բան է՝ երբ ԲՀԿ-ն դառնում է երրորդ բևեռ, այսպես ասած, և մեկ այլ բան է՝ երբ ԲՀԿ-ն համալրում է Կոնգրեսի բևեռը: Իշխանության մեջ գրեթե բոլորը ներկայումս անկասկած «թարս» են նայում ԲՀԿ-ի կողմը՝ փորձելով ըստ երևույթին հասկանալ՝ արդյոք Ծառուկյանը հիմա «կդավաճանի՞», թե՞ չի «դավաճանի» իրենց:
Եվ այս առումով, ներկայիս այդ բարդ վիճակում ՀՀԿ լռությունն առավել քան պերճախոս է: ՀՀԿ-ն այս պարագայում փաստորեն չի ցանկանում ձեռք մեկնել Ծառուկյանին և ցրել այդ կասկածներն ու «խեթ» հայացքները իշխանական համակարգում: Դա նման է մի վիճակի, երբ ԲՀԿ-ն հայտնվի ճահճում, իսկ ՀՀԿ-ն կողքին կանգնած լուռ հետևի, թե ինչպես է կուսակցությունը դուրս գալու այդ ճահճից:
Ներկայումս հենց այդ վիճակն է, և Հանրապետականը որևէ մեկնաբանություն չտալով՝ էլ ավելի է խորացնում կասկածների մթնոլորտը իշխանության մեջ՝ գիտակցելով, որ դա իսկապես լրջորեն հարվածում է «Բարգավաճ Հայաստանին», թուլացնում Ծառուկյանի խարիզման, ստիպում նրան իջնել իր բարձրությունից: Հանրապետականը ըստ երևույթին սպասում է, թե երբ է Ծառուկյանը պարզապես դիմելու օգնության խնդրանքով: Թեև թվում է, որ այս իրավիճակում ԲՀԿ-ին արդեն ՀՀԿ-ն էլ չի օգնի: