Ինչպես հաղորդում է BMF կայքը՝ հղում անելով The Guardian-ին, բրիտանական նավթագազային British Petroleum ընկերությունը թաքցրել է 2008 թ. Ադրբեջանի նավթահանքերից մեկում տեղի ունեցած պայթյունը: Երջանիկ պատահականությամբ, պայթյունից մարդ չի զոհվել, 212 աշխատակիցներ տարհանվել են, իսկ գազի արդյունահանման ծավալները կտրուկ նվազել են:
Այդ ժամանակ British Petroleum-ի Ադրբեջանի ստորաբաժանման ղեկավար Բիլ Շրեյդերը հայտնել էր, որ պատճառները անհայտ կմնան: Սակայն 2009 թ. Բաքվում ԱՄՆ դեսպանատան կողմից ուղարկված նամակներում ասվում է, որ պայթյունի պատճառ է հանդիսացել ցեմենտի վատ որակը (այն, ինչի վրա British Petroleum-ը բարդում էր մեքսիկական ծոցում տեղի ունեցած արտահոսքը 2010 թ.-խմբ.):
Դեսպանատան հաղորդագրության մեջ, որը տպագրել է թերթը, նաև ասվում է, որ Ալիևը British Petroleum-ին մեղադրել է մոտ 10 մլրդ դոլար պետությանը չվճարելու մեջ, նաև՝ որ Կասպից ծովում հանքավայրերի շահագործման իրավունքը ստանալու համար բրիտանական ընկերությունը շանտաժ է կիրառել: