«Սահմանադրական դատարանի որոշումներին միանգամից արձագանքելը դժվար է, այդ է պատճառը, որ վիրավորանքի և զրպարտության ապաքրեականացման մասին քննարկումներից հետո ես միանգամից չարձագանքեցի դրան»: Այսօր կայացած մամուլի ասուլիսում այս մասին հայտարարեց Հայաստանի Մարդու իրավունքների պաշտպան Կարեն Անդրեասյանը` կրկին շեշտելով, որ իր դիտարկումները ուշացել են ոչ այն պատճառով, որ ՍԴ որոշումն իր համար անկարևոր էր:
«Սա 37 էջից բաղկացած բարդ փաստաթուղթ էր: Ձևակերպման հետ, թե ՍԴ-ն մերժել է ՄԻՊ-ին, համաձայն չեմ: Նրանք, ովքեր նման կերպ են մեկնաբանում գործընթացը, իմ և իմ գործունեության հանդեպ անարդար են: Միաժամանակ, ՍԴ-ն որոշակի դրական քայլ է կատարել, քանի որ տվել է չափազանց կարևոր բնորոշումներ, որոնք հետագայում կարգավորելու են լրատվական դաշտը:
Ճիշտ է, ամեն բան իդեալական չէ, և ակնհայտ է, որ իմ կողմից արդյունքների վերաբերյալ որոշակի հիասթափություն կա: Որպես ՄԻՊ` ես հասկանում եմ, որ օրենսդրական վակուում չպետք է առաջանա: Որպես մարդ` ես կուզեի մի քանի ժամում լուծած լինել բոլոր լրատվամիջոցների խնդիրները: Դրա համար էլ լրատվամիջոցներին առաջարկում եմ համատեղ աշխատել և լուծել ոլորտում առկա խնդիրները: Ես պատրաստ եմ համագործակցել:
Միաժամանակ համոզված եմ, որ լավագույն մեթոդը լրատվամիջոցների ինքնակարգավորման գործոնն է: Դատարաններից մարդկանց պետք է տանել ինքնակարգավորման մարմին. սա է իմ աշխատանքի ուղղություններից մեկը, դա բոլորիս աշխատանքն է, և մեկ օրում չի կարգավորվելու: Պետք է դատարանին այլընտրանք լինի, որպեսզի իրեն արատավորված զգացող մարդը կարողանա թանկ փաստաբանի հետ միանգամից չգնալ դատարան: Իսկ օլիգարխները, ովքեր փաստաբաններին դիմելու խնդիր չունեն, այդ մարմնին պետք է դիմեն ամոթից դրդված:
Ամենատխուրն այն է, որ լրատվամիջոցները չեն կարողանում միասնականորեն պաշտպանել իրենց, կիրառել իրենց պաշտպանելու հնարավորությունը: Միաժամանակ չպետք է թույլ տալ, որ լրատվամիջոցները ինքնաքննադատությամբ զբաղվեն»,- նկատեց Կարեն Անդրեասյանը:
Նրա խոսքով` որոշ հասկացություններ օրենքում կարելի էր այլ կերպ սահմանել: «Լավ կլիներ` տուգանքների շեմի հստակ սահման մշակվեր: Վիրավորանքի և զրպարտության ապաքրեականացման մասին ՍԴ որոշումը պետք է լինի բոլոր դատավորների ձեռքին կամ սեղանին. միայն այդ դեպքում կունենանք լավ դատական որոշումներ»,- նկատեց ՄԻՊ-ը:
