Երեկ՝ նոյեմբերի 29–ին «Հին Էրիվան» հոլդինգ ընկերության աշխատակիցները հոլդինգի սեփականատեր Մանվել Տեր-Առաքելյանի գլխավորությամբ Unibank-ի շենքի առջև ցույց են կազմակերպել: Նրանք հետևյալ կոչերով դիմել են բանկի տնօրինությանը. «Unibank, հե՛տ քաշեք ձեր կեղտոտ ձեռքերը «Հին Էրիվան» հոլդինգից», «Պահանջում ենք Վարդան Աթայանի հրաժարականը»։
Մանվել Տեր-Առաքելյանի խոսքերով՝ Unibank-ի կառավարիչ Վարդան Աթայանն ուզում է տիրանալ հոլդինգին։ Մոտ 7 ամիս է՝ բանկի ղեկավարության հետ չեն կարողանում բանակցել։
Այս ամենի պատճառն այն է, որ Unibank-ում գրավադրվել էր «Հին Էրիվան» ռեստորանը։ Որոշ ժամանակ անց, պատճառաբանելով, թե վարկը չի վճարվել, և կան ժամկետանց պարտքեր, բանկը որոշել է աճուրդի հանել ռեստորանը:
Ըստ Մ. Տեր-Առաքելյանի՝ հոլդինգն ամեն ամիս կատարել է սահմանված վճարումները, և բանկի մեղադրանքներն իրականությանը չեն համապատասխանում։ Տեր-Առաքելյանը դիմել է դատարան` պահանջելով չեղյալ համարել իրեն անպատասխանատու վարկառու ճանաչելու մասին բանկի որոշումը:
Մոտ մեկ ամիս առաջ Երևանի Կենտրոն և Նորք-Մարաշ համայնքների ընդհանուր իրավասության դատարանը որոշում է կայացրել` կասեցնելու դատական գործի ընթացքը:
Unibank-ը հոլդինգից պահանջում է միանգամից վերադարձնել մոտ 1 միլիարդ դրամ պարտքը: Արդյունքում արգելանք է դրվել «Հին Էրիվանի» գույքի, դրամարկղերի մուտքերի վրա:
Բանկի դիմաց բողոքողները ցանկացել են իրենց պահանջը գրավոր ներկայացնել տնօրինությանը, բայց այն չեն վերցրել։
