Իսրայելի խորհրդարանն օրերից մի օր պետք է ճանաչի Հայոց ցեղասպանությունը, որովհետև դա պահանջում է Իսրայելի հասարակությունը՝ սկսած Քնեսեթի նախագահից, վերջացրած մտավորականներից ու հրապարակախոսներից: «Առաջին լրատվական»-ի հետ զրույցում այս մասին հայտարարեց ՀՅԴ Հայ դատի և քաղաքական հարցերի գրասենյակի ղեկավար Կիրո Մանոյանը:
«Անկախ Թուրքիայի հետ հարաբերություններից՝ իսրայելական հասարակությունը տարիներ ի վեր պահանջում է ճանաչել Հայոց ցեղասպանությունը: Հնարավոր է, սակայն, Կրթության հարցերով հանձնաժողովում Հայոց ցեղասպանության ճանաչման քննարկումները երկար տևեն»,- նկատեց նա:
Հարցին՝ արդյոք Ցեղասպանության ճանաչման համար ամենանպատակահարմար հանձնաժողովը վերոնշյալ՝ Կրթության հանձնաժողո՞վն է, ՀՅԴ Հայ դատի և քաղաքական հարցերի գրասենյակի ղեկավարը պատասխանեց. «Դա իրենք կորոշեն, իրենց որոշելիք հարցն է»:
Հիշեցնենք, որ իսրայելական «Մերեց» կուսակցության պատգամավոր Զահավա Գալոն խոստացել է դեկտեմբերի առաջիկա օրերին Ցեղասպանության ճանաչման հարցը կրկին քննարկման ներկայացնել Քնեսեթի Կրթության հարցերով հանձնաժողովում: