ԿԲ նախկին նախագահ Բագրատ Ասատրյանը այսօր լրագրողների հետ հանդիպման ժամանակ, համեմատելով 2009թ ծրագրային բյուջեն 2011թ. ծրագրային բյուջեի հետ, նշեց, որ եկամտային մասով 2009թ. բյուջեի համեմատ 2011-ի բյուջեն ենթադրում է ինչպես եկամուտների հավաքագրման աստիճանի նվազեցում, այնպես էլ մի շարք կարևոր մասերի համար նվազեցում: Մասնավորապես, ըստ ԿԲ նախկին նախագահի, 2009-ի ծրագրայինի համեմատ 2011-ի ծրագրային բյուջեում կրթությանը հատկացվելիք ծախսերը 14.4%-ով պակաս են: Սոցիալական պաշտպանվածությանն ուղղված ծախսումներն էլ, ըստ ԿԲ նախկին նախագահի, թեև 2011-ի բյուջեով ավելացված են 7,7 տոկոսով, 2009թ. բյուջեի համեմատ, բայց բավարար չեն, քանի որ գնաճը կարող է դրանից զգալիորեն մեծ լինել: «Ես ուզում եմ հիշեցնել ու սա մեր համընդհանուր խնդիրն է, որ այս պահին, ինը ամիսների տվյալներով, գնաճը 7,8 տոկոս է, այսինքն՝ մեր թոշակառուներն առնվազն 0,1 տոկոսով ավելի վատ են ապրելու, քան ապրել են: Այսինքն՝ կառավարության՝ սոցիալական պաշտպանվածության գերակայությունը այսպես է կատարվում»,- ասաց Բ. Ասատրյանը: