Շենգավիթի վարչական շրջանի ընդհանուր իրավասության դատարանում ավարտվեց ՀՀ ԶՈՒ պայմանագրային զինծառայող, լեյտենանտ Արտակ Նազարյանի մահվան գործով հերթական դատական նիստը: Նիստին պետք է շարունակեր ցուցմունք տալ տուժողի իրավահաջորդը՝ Արտակ Նազարյանի մայրը՝ Հասմիկ Հովհաննիսյանը, սակայն վերջինս առողջական խնդիրներ է ունեցել, և, որպես իրավահաջորդ, հանդես է եկել Արտակի քույրը՝ Ծովինար Նազարյանը:
Դատարանում այսօր վկայություն են տվել Արտակ Նազարյանի ծառայակից Արման Մնացականյանն ու վաշտի հրամանատար Գագիկ Ուդումյանը: Մնացականյանը դատարան է ներկայացել առանց անձը հաստատող որևէ փաստաթղթի, իսկ Ուդումյանը խոստովանել է, որ ինքը ժամանակին կանոնագիր չի կազմել վաշտում տիրող անօրինականությունների մասին: Նրա վկայությունը դատարանն ընդմիջել է: Դատական նիստը կշարունակվի վաղը:
Պաշտոնական վարկածի համաձայն` Արտակ Նազարյանն ինքնասպան է եղել, իսկ այդ քայլին նրան դրդել են իր 5 զինակիցները, որոնց մեղադրանք է առաջադրվել: Սակայն Արտակ Նազարյանի հարազատները պնդում են, որ նախաքննությունը կատարվել է ապացույցների ոչնչացումներով ու կեղծումներով:
Նիստից հետո Արտակ Նազարյանի քույրը լրագրողներին ասել է, թե նախապես որոշված է եղել, որ սկզբում պետք է իրավահաջորդը դատարանում հարցաքննվի, հետո նոր՝ վկաները, սակայն այսօր հարցաքննվել են վկաները։
