«Երկիր» միության ծրագրերի համակարգող Ռոբերտ Թաթոյանը հույս ունի, որ Սերժ Սարգսյանի՝ Վրաստան կատարած այցի ընթացքում այլ հարցերի շարքում, երկու երկրների նախագահների մակարդակով կքննարկվի նաև քաղբանտարկյալ Վահագն Չախալյանի ազատ արձակման հարցը: Այս մասին նա ասաց «Առաջին լրատվական»-ի հետ զրույցում:
«Հույս կա, որ Չախալյանի հարցը կբարձրաձայնվի, սակայն կոնկրետ տեղեկատվություն այդ առումով չունենք: Բոլոր դեպքերում հարցը հասարակական հնչեղություն ունի, և մենք հուսով ենք, որ այդ հարցը Սարգսյան-Սաակաշվիլի հանդիպման ժամանակ կշոշափվի, քանի որ այն վիրահայության խնդիրների մաս է կազմում: Իլյա Երկրորդի հետ հանդիպման ժամանակ հարցը նախկինում բարձրացրել է նաև Գարեգին Բ Կաթողիկոսը»,- հիշեցրեց Ռոբերտ Թաթոյանը:
Նրա խոսքով, սակայն, վրացական կողմը Վահագն Չախալյանի հարցի լուծումն ուշացնելու նպատակով մշտապես «կեղտոտ» մեթոդներ է կիրառում: «Նախագահների մակարդակով կազմակերպված կամ միջկառավարական հանդիպումներից առաջ նրանք տարաբնույթ խնդիրներ են բարձրացնում՝ էական խնդրից հայկական կողմի ուշադրությունը շեղելու համար: Այս դեպքում դա Վերին Լարսի անցակետը փակելն է, այսինքն՝ վրացիներն արհեստականորեն վատացնում են իրավիճակը, և երբ նախագահը գնում է Վրաստան, ստիպված է լինում առաջնային կերպով այդ հարցերը քննարկել: Սա անուղղակի շանտաժի քաղաքականություն է»,- համոզմունք հայտնեց «Երկիր» միության ծրագրերի համակարգողը:
Ամփոփելով՝ Թաթոյանը նշեց, որ Վահագն Չախալյանը Վրաստանի նախագահ Միխեիլ Սաակաշվիլիի քաղաքական հակառակորդն է և վերջինիս ազատ արձակումը հնարավոր է միայն այդ երկրում իշխանափոխության և ժողովրդավարական կարգերի հաստատման պարագայում: «Սաակաշվիլին շարունակում է կառչած մնալ իր գործած սխալներին: Չախալյանին ազատ չարձակելը մի տեսակ սկզբունք է դարձել նրա համար»,- ասաց նա:
Նշենք, որ այսօր՝ նոյեմբերի 29-ին, Սերժ Սարգսյանը երկօրյա պաշտոնական այցով մեկնել է Վրաստան: Այցի ընթացքում ՀՀ նախագահը հանդիպումներ կունենա Վրաստանի նախագահ Միխեիլ Սաակաշվիլիի, խորհրդարանի նախագահ Դավիթ Բաքրաձեի, Համայն Վրաստանի Կաթողիկոս-Պատրիարք Իլյա Երկրորդի հետ: Նախատեսվում է նաև մի շարք ոլորտներում երկկողմ համագործակցության զարգացմանն ուղղված փաստաթղթերի ստորագրման արարողություն: