Նախագահ Սերժ Սարգսյանն այսօր այցելել է Երևանում գտնվող տեղեկատվական տեխնոլոգիաների ոլորտում ամբողջական ծրագրային փաթեթներ և ծառայություններ առաջարկող «Սիներջի Ինթերնեշնըլ Սիսթըմզ» (Սիներջի) ընկերության հայաստանյան մասնաճյուղի բիզնես կենտրոնի նորակառույց մասնաշենք: Հանրապետության ղեկավարը շրջել է ՏՏ ոլորտի տարածաշրջանային կենտրոն դարձած համալիրում, ծանոթացել ժամանակակից չափանիշներին համապատասխան կառուցված գրասենյակի պայմաններին, ընկերության ընթացիկ աշխատանքին և առաջիկա ծրագրերին:
«Սիներջի Ինթրնեշնըլ Սիսթըմզ» (Սիներջի) ընկերությունը հիմնվել է 1997 թ. ԱՄՆ Վիրջինիա նահանգում և գործունեություն է ծավալում Կենտրոնական Ամերիկայի, Կարիբյան ավազանի, Եվրոպայի, Ասիայի, Մերձավոր Արևելքի և Աֆրիկայի մի շարք երկրներում:
Սիներջիի հայաստանյան մասնաճյուղը գործում է 1999 թվականից: Այն հիմնադրման պահին ուներ միայն 5 աշխատակից, սակայն տարիների ընթացքում ընդլայնվեց՝ այդ թիվը հասցնելով 120-ի: Վերջին տարիներին ընկերության գործունեության ընդլայնումը մի շարք ասիական, միջինարևելյան, արևելաեվրոպական և ԱՊՀ երկրներում անհրաժեշտություն էր առաջացրել Հայաստանում ստեղծել տեղեկատվական տեխնոլոգիաների տարածաշրջանային կենտրոն, որը ոչ միայն կհանդիսանար այս երկրներին սպասարկող և այնտեղից ժամանած մասնագետների վերապատրաստման ուսումնական կենտրոն, այլև հնարավորություն կընձեռեր ընդլայնելու ընկերության հայաստանյան մասնաճյուղի գործունեությունը` առկա 120 աշխատատեղին ավելացնելով ևս 250-ը: Ընկերության հենց այս մասնաճյուղում են մշակվում և աշխարհի շուրջ 30 երկրի պատվիրատուներին տրամադրվում Սիներջիի մեծ պահանջարկ ունեցող ծրագրային փաթեթները:
