Ամերիկահայերը 1915 թ. Ցեղասպանության հետևանքով իրենց պապերի կորցրած ունեցվածքը փոխհատուցելու պահանջով Լոս Անջելեսի շրջանային դատարան դատական հայց են ներկայացրել թուրքական պետության և այդ երկրում գործող Կենտրոնական և Ziraat բանկերի դեմ: Նախաձեռնությունն ամերիկահայ փաստաբան Վարդգես Եղյանինն է:
«Ադանայում տեղակայված ամերիկյան օգտագործման Ինջիրլիքի ռազմաբազայի 49.5 հա տարածքը ժամանակին պատկանել է հայերին: Այժմ նրանց ժառանգները այդ հողատարածքի կորստի դիմաց պահանջում են ընդհանուր առմամբ 63.9 մլն դոլարի փոխհատուցում»,- ըստ Anadolu գործակալության` լրագրողներին հայտնել է փաստաբան Եղյանը: Հաշվի է առնվում նաև այն հանգամանքը, որ թուրքերը, այդ տարածքը ռազմական նպատակով ամերիկացիներին վարձակալության տալով, իրենց համար շահույթ են ապահովել:
