News Georgia-ի փոխանցմամբ՝ Վրաստանի նախագահ Միխեիլ Սաակաշվիլին Թբիլիսիում Հայաստանի նախագահ Սերժ Սարգսյանի հետ կազմակերպված համատեղ մամլո ասուլիսի ժամանակ հայտարարել է, որ հայ-վրացական հարաբերություններն այսքան բարձր մակարդակի չեն եղել, որքան որ այսօր, և դրանում իր մեծ դերն ունի Հայաստանի նախագահը.
«Մենք խնդիրներ չունենք մեր երկկողմանի հարաբերություններում։ Երկու պետությունների միջև չկան խնդիրներ, որոնք օպերատիվ կերպ չլուծվեին։ Երկու երկրների հարաբերությունները փորձաշրջան են անցել. 2008 թվականի օգոստոսյան պատերազմից հետո Հայաստանը Վրաստանին շատ մեծ բարոյական աջակցություն է ցուցաբերել։ Հայաստանի նախագահն աշխատում է, որ Հայաստանը հարևանների համար շարունակի մնալ հուսալի գործընկեր։
Այս տարի Վրաստանի պետական սահմանը հատել են Հայաստանի 600,000 քաղաքացիներ։ Երկու երկրների քաղաքացիների համար շատ կարևոր է, որ սահմանային ստուգումը լինի առավելագույնս պարզեցված։ Մեր սահմանները պետք է այնպես թափանցիկ լինեն, ինչպես Շվեյցարիայի ու Ֆրանսիայի միջև սահմանը»։
Անդրադառնալով Կովկասի հակամարտություններին՝ Սաակաշվիլին ընդգծել է, որ «դրանք բոլորը» արհեստականորեն ստեղծված և հրահրված են կայսերական ուժերի կողմից. «Ես վստահ եմ, որ դրանք կլուծվեն ավելի արագ, քան կարելի է պատկերացնել»։