Տարածքային կառավարման նախարարության հասարակայնության հետ կապերի բաժնից «Առաջին լրատվական»-ին տեղեկացնում են, որ ՀՀ փոխվարչապետ, տարածքային կառավարման նախարար Արմեն Գևորգյանն այսօր ընդունել է ՌԴ տարածքային զարգացման նախարար Վիկտոր Բասարգինին:
Վերջինս Երևանում է` մասնակցելու ԱՊՀ անդամ պետությունների շինարարական գործունեության բնագավառում համագործակցության միջկառավարական խորհրդի 32-րդ նիստին:
Կողմերը քննարկել են ՀՀ տարածքային կառավարման և ՌԴ տարածքային զարգացման նախարարությունների միջև փոխգործակցությանը վերաբերող հարցեր:
Կարևորվել է երկու երկրների միջև ապակենտրոնացված մակարդակով գործակցության խորացումը: Նշվել է, որ այդ ուղղությամբ կատարված քայլերը և առաջիկա անելիքները նոր հեռանկարներ են բացում հարաբերությունների զարգացման համար:
Ապրիլին Երևանում անցկացված հայ-ռուսական միջտարածաշրջանային առաջին համաժողովի արդյունքները դրական գնահատելով` երկուստեք համոզմունք են հայտնել, որ հաջորդ նմանատիպ միջոցառումների ժամանակ առավել գործնական և ավելի նպատակաուղղված ծրագրեր ու նախագծեր կներկայացվեն: Արձանագրվել է, որ այս ձևաչափով համագործակցությունը երկու կառավարությունների ուշադրության կենտրոնում է:
Այդ նպատակով միջկառավարական հանձնաժողովի շրջանակում ստեղծվել է հայ-ռուսական միջտարածաշրջանային համագործակցության հարցերով աշխատանքային խումբ, որը հայկական կողմից ղեկավարում է Տարածքային կառավարման նախարարի առաջին տեղակալ Վաչե Տերտերյանը, ռուսական կողմից` Տարածքային զարգացման նախարարի տեղակալ Մաքսիմ Տրավնիկովը:
Արդեն հաստատվել են աշխատանքային խմբի երկու կողմերի կազմերը և զրուցակիցներն առաջիկայում համանախագահների հանդիպում կազմակերպելու պայմանավորվածություն են ձեռք բերել, որի ընթացքում կորոշվի նաև խմբի օրակարգային հարցերի շրջանակը:
Անդրադարձ է կատարվել նաև հայ-ռուսական միջտարածաշրջանային երկրորդ համաժողովի անցկացման հարցերին, կարևորվել է նաև նոր կապերի հաստատումը գործակցության ներուժ և միմյանց նկատմամբ հետաքրքրություն ունեցող տարածաշրջանների միջև:
Զրուցակիցները քննարկել են նաև ԱՊՀ մասնակից-պետությունների միջռեգիոնալ և մերձսահմանային համագործակցության խորհրդի շրջանակում փոխգործակցությանն առնչվող հարցեր, կարևորվել է խորհրդի, որում այս տարի նախագահում է Հայաստանը, աշխատանքների ակտիվացման անհրաժեշտությունը:
Անդրադարձ է կատարվել խորհրդի կողմից մշակվող երկու փաստաթղթերի` մինչև 2020թ. ընկած ժամանակահատվածում ԱՊՀ մասնակից-պետությունների միջռեգիոնալ և մերձսահմանային համագործակցության հայեցակարգի նախագծի և հայեցակարգից բխող` միջոցառումների ծրագրի նախագծի ամբողջականացման եւ դրանք ԱՊՀ գործադիր կոմիտեին ներկայացնելու հետ կապված հարցերին:
Ա. Գևորգյանն ու Վ. Բասարգինը քննարկել են նաև տեղական ինքնակառավարման և տարածքային կառավարման համագործակցության հարցերով զբաղվող միջազգային կազմակերպություններում փոխգործակացության խորացման հարցեր: