Ռուսաստանը որպես հեգեմոն բևեռ` անում է ամեն ինչ, որպեսզի թույլ չտա հզորանալ աշխարհի մյուս հեգեմոն բևեռին` ԱՄՆ-ին. հենց սրանով կարելի է բացատրել Ռուսաստանի անհանգստությունը ամերիկյան հակահրթիռային համակարգի տեղակայման առնչությամբ: Այսօր կայացած մամուլի ասուլիսում այս մասին հայտարարեց միջազգային հարաբերությունների մասնագետ Մենուա Սողոմոնյանը:
«Ռուսաստանի մտահոգությունն այն է, որ ամերիկյան կողմը հրաժարվում է պաշտոնապես հաստատել, թե հակահրթիռային համակարգը ուղղված չի լինելու Ռուսաստանի բալիստիկ հրթիռների դեմ:
ԱՄՆ-ն իր հերթին փորձում է իրեն ապահովագրել Ռուսաստանի իռացիոնալ դիրքորոշումից: Ընդհանուր առմամբ ռուս-ամերիկյան հարաբերություններում վերջին ժամանակներս նկատելի են սառը պատերազմի որոշակի տարրեր»,- նշեց բանախոսը`ավելացնելով, որ մոտակա երեք տարիների համար Ռուսաստանը նախատեսում է 6 տրիլիոն ռուբլի կամ 200 միլիարդ դոլար տրամադրել սեփական բանակի սպառազինմանը:
Մենուա Սողոմոնյանը անդրադարձավ նաև Իրանի վրա ԱՄՆ-ի հնարավոր հարձակման թեմային և նկատեց, որ գործընթացների նման զարգացման դեպքում Իրանը համարժեք պատասխան կտա ամերիկյան կողմին:
«Իրանի հետ կապված ցանկացած ռազմական գործողություն վատ է անդրադառնալու Հայաստանի վրա, և չի բացառվում, որ այս դեպքում Ադրբեջանը օգտվելով` անգամ հարձակվի Լեռնային Ղարաբաղի վրա»,- ամփոփեց միջազգային հարաբերությունների մասնագետը: