Ի՞նչ կանի Ռոբերտ Քոչարյանը, եթե մի պահ տեսականորեն ենթադրենք, որ Լևոն Տեր-Պետրոսյանի հայտնի ելույթում նկարագրված քաղաքագիտական սցենարը դառնում է իրականություն, և Գագիկ Ծառուկյանը տարանջատվելով իշխանությունից և Ռոբերտ Քոչարյանից` միանում է Հայ ազգային կոնգրեսի պայքարին: Քոչարյանին այդ ժամանակ կմնա կամ գալ և միանալ Կոնգրեսին՝ Ծառուկյանի հետ միասին, եթե, իհարկե, Կոնգրեսն ընդունի Քոչարյանի «ինդուլգենցիան», կամ էլ գնալ ու միանալ Սերժ Սարգսյանին, քանի որ առանց «Բարգավաճ Հայաստան»-ի գործոնի Սերժ Սարգսյանը հաշված րոպեների ընթացքում Քոչարյանին կզրկի մնացյալ ազդեցությունից:
Կոնգրեսն, իհարկե, չի կարող Քոչարյանին ընդունել, քանի որ այդ դեպքում ինքնին կքանդվի Կոնգրեսի տրամաբանությունը, և ընդդիմադիր ուժի մարգինալացումը կդառնա կատարված փաստ: Հետևաբար, Լևոն Տեր-Պետրոսյանի քաղաքագիտական տեսությունը, տեսականորեն, Քոչարյանին ու Սարգսյանին դարձնում է, այսպես ասած, բնական դաշնակիցներ, իհարկե` Սարգսյանի հրամանատարությամբ, քանի որ Քոչարյանը հրամանատարության ռեսուրս չունի: Դաշնակիցներ այն հարցում, որ միասին խանգարեն «Բարգավաճ»-ի անցումը դեպի Կոնգրես: Կրկնում ենք, սա` տեսականորեն, եթե ենթադրենք, որ Տեր-Պետրոսյանի նկարագրած սցենարը դառնում է իրականություն:
Մինչդեռ քաղաքագիտական վերլուծության յուրաքանչյուր հեղինակ երևի թե պետք է ենթադրի իր վերլուծության տեսական բոլոր վեկտորները: Հետևաբար, Տեր-Պետրոսյանը պետք է ենթադրեր, որ Քոչարյանն ու Սերժ Սարգսյանը ԲՀԿ-ին պահելու հարցում դառնում են ըստ էության շահեկան դաշնակիցներ: Այսինքն` նրանք երկուսն էլ շահագրգռված են, որ ԲՀԿ-ն մնա իշխանության մեջ: Առաջին հերթին` Քոչարյանը, որի համար առավել նախընտրելի է` ԲՀԿ-ն լինի Սերժ Սարգսյանի կողքին, քան Լևոն Տեր-Պետրոսյանի:
Այդպիսով ստացվում է, որ խոսելով ներիշխանական հակասությունների մասին` Լևոն Տեր-Պետրոսյանն իր խոսքի տեսական վեկտորներից մեկում ըստ էության նպաստում է իշխանության առավել բյուրեղացմանը տանող տրամադրությունների աճին: Իհարկե, Տեր-Պետրոսյանի ելույթը, ինչպես գրեթե ցանկացած քաղաքագիտական վերլուծություն, թողնում է մի քանի վեկտորի տեսական դիտարկման հնարավորություն, բայց, այդուհանդերձ, ակնհայտ է, որ հիմնականներից մեկը հենց իշխանության բյուրեղացմանը տանող վեկտորն է, առավել ևս այն դեպքում, երբ ԲՀԿ-ն դուրս չգա իշխանությունից: