Ադրբեջանական Salam News գործակալությունը՝ վկայակոչելով РИА Новости-ին, հայտնում է, որ ԱՄՆ փոխնախագահ Ջոզեֆ Բայդենը մոտ օրերս կժամանի Թուրքիա և Հունաստան։ Թուրքիայում նա քննարկելու է հայ-թուրքական հարաբերությունների կարգավորումը, իսկ Հունաստանում՝ տնտեսական խնդիրներ։
Այս մասին երեկ տեղի ունեցած ճեպազրույցի ժամանակ հայտարարել է ԱՄՆ փոխնախագահի՝ ազգային անվտանգության հարցերով խորհրդական Թոնի Բլինկենը. «Այս շաբաթ ԱՄՆ փոխնախագահն այցելելու է Թուրքիա և Հունաստան։ Նրա առաջին կանգառը լինելու է Անկարան, ուր կժամանի դեկտեմբերի 2-ին։
Անկարայում նա կհանդիպի թուրք առաջնորդների հետ, ապա կուղևորվի Ստամբուլ, ուր դեկտեմբերի 3-ին ելույթ է ունենալու Ձեռնարկատիրության համաշխարհային գագաթնաժողովում, որի կազմակերպիչը Թուրքիայի վարչապետ Էրդողանն է։
Անկարայում Բայդենը հանդիպումներ է ունենալու Էրդողանի և նախագահ Աբդուլլահ Գյուլի հետ։ Մենք ակնկալում ենք, որ այդ հանդիպումներում կողմերը քննարկելու են հարցերի լայն շրջանակ՝ կապված Թուրքիայի և ԱՄՆ-ի գործընկերության ու համագործակցության հետ։
Բայդենի հիմնական քննարկման առարկաներն են հանդիսանալու Կիպրոսը, ահաբեկչության դեմ պայքարը, երկու երկրների միջև առևտրի զարգացումն ու թուրք-ամերիկյան ներդրումների ավելացումը։ Քննարկվելու են «Արաբական գարնանը» առնչվող խնդիրներ։
Հանդիպումների ծրագրում, ամենայն հավանականությամբ, ներառված է Աֆղանստանը, ինչպես նաև հայ-թուրքական հարաբերությունների կարգավորման հեռանկարները։
Թուրքիայից Բայդենը մեկնելու է Հունաստան, ուր հանդիպումներ է ունենալու նոր վարչապետ Լուկաս Պապադիմոսի և նախագահ Կարոլոս Պապուլյասի հետ»։