«Ազատություն» ռադիոկայանը տեղեկացնում է, որ Հայաստանում Միացյալ Նահանգների դեսպան Ջոն Հեֆերնը երկուշաբթի օրը այցելել էր Գյումրի:
Անդրադառնալով հայ-թուրքական սահմանի բացման խնդրին, Հեֆերնը կարևորել է այն. «Այդ սահմանի բացման հարցը իմ աշխատանքային կարևորագույն խնդիրներից մեկն է, և ես հույս ունեմ, որ մի օր կգամ ու գնացքով այստեղի կուղևորվեմ Կարս»։
Հիշեցնենք` անցյալ շաբաթ օրը Ջոն Հեֆերնը հայ և թուրք գործարարների մասնակցությամբ անցկացված տնտեսական համաժողովում իր ելույթում նշել էր, որ ԱՄՆ-ը խրախուսում է այսպիսի միջոցառումները, քանի որ դրանք «քաղաքական ուղերձի» դեր ունի։
«Ազատություն» ռադիոկայանի այն հարցին, թե այս վեց շաբաթների ընթացքում, ինչ ինքը դեսպան է, հասցրե՞լ է ծանոթանալ Հայաստանի տնտեսական վիճակին և ինչպե՞ս է գնահատում այն, Հեֆերնը պատասխանել է. «Հայաստանը ցամաքային երկիր է, երկու հարևան երկրների հետ սահմանները փակ են: Դրանց բացման ուղղությամբ մենք աշխատանքներ ենք իրականացնում: Ես նկատել եմ, որ Հայաստանում որոշ ճյուղեր բավականին զարգացում են ապրել, այդպիսի ոլորտներից է տեղեկատվական տեխնոլոգիաների ոլորտը, նաև կա ներուժ, կան տաղանդաշատ մարդիկ, և Հայաստանը կարող է իր առաջընթացն ապահովել»:
Քանի որ դեսպանի այցը ճանաչողական բնույթի էր, նա հանդիպել է նաև հիմնականում սոցիալական ուղղվածություն ունեցող հասարակական կազմակերպությունների ներկայացուցիչների հետ և հասկացել, որ Գյումրիում ամենակարևորը աշխատատեղերի հարցն է:
«Այս հարցը այսօր կարևորում էին բոլոր նրանք, ում հետ հանդիպում ունեցանք: Աշխատատեղերի ստեղծմամբ այս մարզում հնարավորություն կստեղծվի բարելավել ընդհանուր առմամբ առողջապահական ծառայությունները, բնակարանային հարցերը, և տնտեսական զարգացումը շատ դրական տեղաշարժերի կհանգեցնի»,- ասել է Հեֆերնը:
