Ե՞րբ կվերադառնա Գագիկ Ծառուկյանը Դուբայից, ուր մեկնել է իր ծննդյան տարեդարձը նշելու: Այս հարցն է դարձել ներքաղաքական գործընթացի կարևոր թեման այս օրերին, այն բանից հետո, երբ Լևոն Տեր-Պետրոսյանը բացեց կամ սրեց Կոնգրես-ԲՀԿ համագործակցության թեման: Ըստ երևույթին Ծառուկյանը բավական երկար ժամանակ կմնա Դուբայում, քանի որ վերադառնալու պարագայում նա ինչ-որ մի բան պետք է ասի Լևոն Տեր-Պետրոսյանի հայտարարությունների վերաբերյալ:
Մինչդեռ Ծառուկյանի համար ստեղծվել է այնպիսի մի իրավիճակ, որ ինչ էլ ասի, այդ ասածը կարող է բումերանգի նման հետ գալ ու հարվածել իրեն: Այդ իսկ պատճառով, որպեսզի բումերանգը հետ չգա, Գագիկ Ծառուկյանը հավանաբար կնախընտրի Դուբայից շուտ հետ չգալ: Պետք չէ երևի թե բացառել նույնիսկ, որ ԲՀԿ առաջնորդը մնա և Դուբայում իր ծնունդը նշելուց հետո այնտեղ դիմավորի նաև Նոր տարին և նաև հին Նոր տարին: Հնարավոր է, որ Ծառուկյանը նույնիսկ շուրջերկրյա ճանապարհորդություն սկսի` խուսափելով ներքաղաքական գործընթացների կենտրոնում հայտնված լինելու ծանրությունից:
Բանն այն է, որ Ծառուկյանն այսքան ժամանակ եղել է քաղաքական, այսպես ասած, առաջնային դիրքերում, սակայն ըստ էության ոչ մի քաղաքական բովանդակությամբ հայտարարություն չի արել: Մինչդեռ այսօր նա ուղղակի կանգնած է նման հայտարարությունների պարտավորության առաջ: Այսինքն` այսօր կանգնած է մի իրավիճակում, երբ ինչ էլ որ ասի, ստացվելու է քաղաքական լուրջ հայտարարություն: Իսկ Ծառուկյանն ակնհայտորեն պատրաստ չէ դրան, ինչն էլ ստիպում է ենթադրել, որ նա դեռ երկար ժամանակ ճամպրուկները չի պատրաստի Հայաստան վերադառնալու համար, մինչև որ Հայաստանում միգուցե մի նոր հիթ կզբաղեցնի քաղաքական հիթ շքերթի առաջին տեղը, կամ մի նոր աղմուկ կառաջանա որևէ այլ դաշտում, որը կզբաղեցնի հասարակության ուշքն ու միտքը, և ոչ ոք չի նկատի Ծառուկյանի վերադարձը:
