Այսօր Ռուսաստանի Դաշնության վարչապետ Վլադիմիր Պուտինը, ուղիղ եթերում պատասխանելով ռուսաստանցիների հարցերին, պատասխանել է նաև վերջին օրերին Մոսկվայում և Ռուսաստանի այլ քաղաքներում տեղի ունեցած իրադարձությունների վերաբերյալ հարցերին: Խոսելով «կովկասցիների բեսպրեդելի» մասին և պատասխանելով այն հարցին, թե «ինչպես պետք է այս դեպքում իրենց պահեն տեղաբնիկները», Պուտինն ասել է, որ «իրականում պետք է կանխել ծայրահեղականության բոլոր դրսևորումները` անկախ նրանից, թե որ կողմից են դրանք գալիս: Չի կարելի մեկ գույնով ներկել ոչ կովկասցիներին, ոչ էլ ուրիշ ազգությունների ներկյացուցիչներին, չնայած որ կովկասցի ազգություն էլ գոյություն չունի»: «Մենք մեկ երկրի զավակներ ենք, և որպեսզի մեզ հարմար զգանք այդտեղ, համապատասխանաբար էլ պետք է պահենք»,- ավելացրել է նա:
Վլադիմիր Պուտինը նաև ասել է, որ կանխելու կարևորագույն գործառույթն իրենց վրա պետք է վերցնեն իրավապահ մարմինները, որոնք հաճախ հայտնվում են քննադատության տարափի տակ: Բայց պետք չէ, ըստ վարչապետի, իջեցնել դրանք «պլինտուսից ներքև» (նկատի ունի քննադատությունները.- խմբ.), քանի որ, եթե այդ մարմինները չլինեն, մտավորականությունը, որի կողմից ամենաշատն է հնչում քննադատությունը, պետք է «մորուքը խուզի և ինքը պայքարի ծայրահեղականների դեմ»,- ավելացրել է Պուտինը: