«ՀՀ արտահանմանն ուղղված արդյունաբերական քաղաքականության» հայեցակարգն արդեն 1 ամիս է, ինչ Էկոնոմիկայի նախարարությունը հանրային քննարկման է ներկայացրել: Նախարար Տիգրան Դավթյանը հայտնեց, որ կիրակի օրը դրա շուրջ բավականին ընդգրկուն քննարկում է սպասվում. «Ընտրվել են 11 ուղղություններ, որոնք ունեն արտահանման բավականին լուրջ հնարավորություններ և դրանցով հստակ նկարագրված է, թե ինչ քայլեր պետք է իրականացվեն»:
Հայեցակարգով նախատեսվում է մինչև 2012 թ. վերջը հարկային և մաքսային ոլորտում գործարկել ռիսկերի վրա հիմնված վերահսկողության համակարգ, գործարկել առնվազն 2 ազատ տնտեսական գոտիներ (ՌԱՕ «Մարս» գործարանի բազայի վրա և «Զվարթնոց» օդանավակայանում), ձևավորել 3 առաջնահերթ ենթաճյուղերում միջազգայնորեն ընդունված պահանջներին համապատասխան լաբորատորիաներ և հավաստագրման մարմիններ, մինչև 2012 թ. վերացնել արտադրական նշանակության մեքենաների և սարքավորումների ԱԱՀ սահմանի վրա հաշվարկման և գանձման պահանջը, և այլն, և այլն:
Պետությունը նախատեսում է «օպերատիվ կարգով միջամտություններ իրականացնել հրատապ լուծումներ պահանջող հարցերում», մասնավորապես մետաղական հանքարդյունաբերության, մետաղագործական, սննդամթերքի, մեքենաշինության, սարքաշինության և էլեկտրատեխնիկական արտադրության, ակնագործության և ոսկերչության, քիմիական, թեթև արդյունաբերության, շինանյութերի արտադրության ոլորտներում: Ընդ որում՝ այս կարևոր գործի իրականացումն ապահովելու և պետական այլ կառույցների գործունեությունը համակարգելու համար ստեղծվելու է հերթական խորհուրդը՝ վարչապետի գլխավորությամբ: