Պակիստանի վարչապետ Յուսուֆ Ռազա Գիլանին այսօր բացառել է ԱՄՆ-ի հետ «այնպիսի հարաբերություններ, ինչպես դրանք եղել են նախկինում»:
Հիշեցնենք, որ սրա պատճառը շաբաթ օրը ՆԱՏՕ-ի օդային հարձակումն էր Պակիստանի զինված ուժերի վրա, որի պատճառով 24 պակիստանցի զինվոր է մահացել: Այս պատահարը ԱՄՆ-ի համար ավելի դժվարացրել է Իսլամաբադի հետ հարաբերությունները լավացնելը և տարածաշրջանում կայունություն ստեղծելը, մինչ նրա մարտական զորքերը կհեռանան Աֆղանստանից:
Reuters-ը գրում է, որ CNN-ին տված հարցազրույցի ժամանակ, երբ Գիլանիին հարցրել են, թե արդյո՞ք ԱՄՆ-ի հետ հարաբերությունները կշարունակվեն, նա պատասխանել է, որ հարաբերություններն այլևս առաջվա պես չեն լինի և ավելացրել է. «Մենք ավելի մեծ բանի ակնկալիք ունենք՝ մեր ազգին բավարարելու համար»:
Գիլանիի մեկնաբանություններն արտացոլում են Պակիստանի կառավարության և ռազմական ուժերի բարկությունը և այն ճնշումը, որին նրանք ենթարկվում են իրենց ժողովրդի կողմից: «Ոչ մի պատերազմ չես կարող հաղթել առանց զանգվածների օգնության, մենք մեր ժողովրդին մեր կողքին պահելու կարիք ունենք»,– ասել է Գիլանին:
Նա նաև հայտնել է, որ հարաբերությունները կշարունակվեն, եթե միայն հիմնված լինեն «երկկողմանի հարգանքի և հետաքրքրությունների վրա»: Լրագրողի այն հարցին, թե արդյո՞ք Պակիստանը ստանում է այդ հարգանքը, Գիլանին պատասխանել է. «Այս պահին` ոչ»: