Ադրբեջանական կողմի պահվածքը, ի դեմս ղարաբաղա-ադրբեջանական սահմանին հայ զինվորների սպանությունների, մարտավարական իմաստով միտված է ցույց տալու, որ Ադրբեջանի համար պատերազմն ավարտված չէ, և որ ինքը ցանկացած պահի կարող է վերսկսել պատերազմական գործողությունները: «Առաջին լրատվական»-ի հետ զրույցում նման տեսակետ հայտնեց ԼՂՀ նախկին արտգործնախարար Արման Մելիքյանը՝ անդրադառնալով վերջին օրերին սահմանին գրանցվող փոխհրաձգությունների դեպքերին և դրանց արդյունքում երկու կողմերից զինծառայողների զոհվելու փաստին:
«Ինչ վերաբերում է հայկական կողմին, ապա նրա պատասխան գործողությունները միանգամայն համարժեք եմ գտնում: Մենք պարտավոր ենք պատասխանել, և զոհերը միակողմանի չպետք է լինեն: Համարժեքությունն այս առումով թերևս լավագույն տարբերակն է, այսինքն՝ զոհված ամեն հայ մարտիկի դիմաց պետք է խլվի մեկից ավելի ադրբեջանցի զինվորի կյանք: Սա դառը իրողություն է, բայց միաժամանակ՝ պատերազմական իրավիճակի օրինաչափություն: Մենք իրավունք չունենք թույլ տալ ընկճել մեզ, այսինքն՝ մարտի դաշտում հակառակորդը պետք է ավելի քան համարժեք պատասխան ստանա: Այլ հարց է, որ մենք խաղաղ կարգավորման ճանապարհներ պարտավոր ենք փնտրել գուցեև ԵԱՀԿ Մինսկի խմբի կողմից առաջարկված տրամաբանության շրջանակներից դուրս, և սա, թերևս, օգտակար կարող է լինել»,- նկատեց Արման Մելիքյանը:
Հարցին՝ ի՞նչ կերպ կարձագանքի նույն ԵԱՀԿ Մինսկի խումբը ղարաբաղա-ադրբեջանական սահմանին վերջին օրերին կատարվող միջադեպերի առնչությամբ, Մելիքյանը նկատեց. «Մինսկի խումբը, սովորաբար, օգտագործում է նման միջադեպերը, որպեսզի մեկ անգամ ևս ընդգծի, թե որքան կարևոր է իր գործունեությունը, և խաղաղության պահպանումը միանգամայն կախված է իր հաջող գործողություններից: Սա նաև Մինսկի խմբին թույլ է տալիս կողմերի վրա լրացուցիչ ճնշումներ գործադրել: Ընդ որում՝ այդ ճնշումները, չգիտես ինչու, հիմնականում ուղղված են ընդդեմ հայկական կողմերի՝ ասելու, որ «տեսնո՞ւմ եք, դուք ինչ-ինչ խնդիրներում թերանում եք, ադրբեջանական կողմն էլ այս կարգի գործողությունների է դիմում, այսինքն՝ ձեր կրած զոհերը ձեր համառության արդյունքն են»: Սա է այն միտքը, որ փորձում են հաղորդել նրանք Հայաստանին և ԼՂՀ-ին»,- ամփոփեց նա:
Նշենք, որ անցած շաբաթվա ընթացքում ադրբեջանական դիպուկահարների գնդակից երկու հայ զինծառայող էր սպանվել: Հայկական կողմի ձեռնարկած պատժիչ գործողությունների արդյունքում ադրբեջանական բանակը զգալի զոհեր էր տվել:
