ՀՅԴ գերագույն մարմնի ներկայացուցիչ, ԱԺ պատգամավոր Արմեն Ռուստամյանն այսօր ԱԺ-ում պատասխանելով լրագրողների հարցերին՝ անդրադարձավ Հայ ազգային կոնգրեսի առաջնորդ Լևոն Տեր-Պետրոսյանի` ԲՀԿ հետ հնարավոր համագործակցության մասին ուրբաթօրյա հանրահավաքում հնչած հայտարարություններին:
«Ակնհայտ է, և դա նաև Լևոն Տեր-Պետրոսյանի ելույթում արծարծվում էր, որ կա հասարակական պահանջ` երրորդ բևեռի ձևավորման, և այդ երրորդ բևեռի ձևավորումը, չնայած որ վաղուց հասարակական պահանջ էր, չգիտես ինչու Լևոն Տեր-Պետրոսյանը պատկերացնում է, որ պետք է լինի իշխանական բևեռում: Ես, բնականաբար, դրան կատեգորիկ համաձայն չեմ, որովհետև, եթե իշխանությունները ունենային այդպիսի սովորություն` ժողովրդի հասարակական պահանջի նկատմամբ, վաղուց իրականացրած կլինեին տարբեր պահանջներ, որոնք հասարակության մոտ ձևավորվում են: Երբ որ հասարակական պահանջ է առաջանում, բնականաբար, հասարակական պահանջը կբավարարեն այն քաղաքական ուժերը, ովքեր ունեն համապատասխան հեղինակություն, և հասարակությունը կարող է ընդունել այդ առաջարկները:
Ինչ վերաբերում է ԲՀԿ-ին, ապա ԲՀԿ-ն ինքնուրույնություն է դրսևորում` առայժմ լինելով կոալիցիայի մեջ: Հիմա ամեն ինչ արվում է, որպեսզի այդ ինքնուրույնությունը կանխվի: Որովհետև այսօր ակնհայտ է, որ կոալիցիայի դոմինանտ ուժը` ՀՀԿ-ն, փորձում է ամեն ինչ անել, որպեսզի մեկ ցանկով, բոլորը` կոալիցիայի մաս կազմող կուսակցությունները մասնակցեն ԱԺ ընտրություններին: Դա բխում է ՀՀԿ շահերից, որովհետև զանազան խաղեր, որոնք կարող են ջլատել իշխանական ռեսուրսը, շատ ավելի վտանգավոր է այսօր թվում իշխանություններին, քան մնացած բոլոր տիպի գործընթացները, որոնք կարող են ժողովրդավարական բնույթ ունենալ:
Իշխանությունների թիվ մեկ խնդիրը վերարտադրվելն է, և այդ վերարտադրման հիմնական ռեսուրսը վարչահրամայական և ֆինանսական լծակներն են: Այս դաշտում երբ առաջանում են խլրտումներ, բնական է, որ սա մեծ տագնապ է առաջացնում իշխանությունների մեջ»,- նկատեց Ա. Ռուստամյանը:
Այնուհետև նա պարզաբանեց. «Այս ճանապարհին ԲՀԿ-ն ինքնուրույնություն է փորձում դրսևորել, և մեկ անգամ դա կանխեցին` փորձելով փետրվարյան հռչակագիրը ստորագրել, սակայն պարզ դարձավ, որ դա բոլորովին էլ երաշխիք չի հանդիսանում: Ուստի դա չբավարարեց… Իմ համար անհասկանալի է` ի՞նչ ասված չի այդ հռչակագրում, որ հիմա ինչ-որ նոր բան պետք է ասել… Էլ ի՞նչ`երդում պետք է տա՞ն կոալիցիայի մեջ եղած կուսակցությունները, որ հավիտյանս հավիտենից պաշտպանելու են գործող առաջատար քաղաքական ուժի՞ն և գործող նախագահի՞ն… »:
Հնարավոր համարո՞ւմ է ԲՀԿ-ՀԱԿ համագործակցությունը հարցին պատասխանելիս Ա. Ռուստամյանը նկատեց. «Այն ժամանակ, եթե հիշում եք, Լևոն Տեր-Պետրոսյանը ԲՀԿ-ին ուղղված հարձակումով էր արձագանքում: Վերհիշեք` ԲՀԿ առջև թե իշխանության ներսից էին խնդիրներ դնում, թե` այս ի՞նչ ես անում, նախատում էին, որ միասին ենք և այլն… Մյուս կողմից էլ՝ ՀԱԿ-ը որակում էր այսպես, թե` սա խաղ է, շփոթ եք առաջացնում ընդդիմադիր դաշտում և այլն… Հիմա ես շատ լուրջ փոփոխություններ եմ տեսնում ՀԱԿ առաջնորդի մոտեցումներում: Նախ այն, որ բացարձակ հեղինակություն լինելու և ընդդիմադիր դաշտը սեփականաշնորհելու այդ մոտեցումը կարծես թե փոխվում է: Եթե այսօր նա խոսում է ընդդիմադիր դաշտի ընդլայնման մասին` դա բավական մեծ առաջընթաց եմ համարում, քանի որ հասկանալի է, որ մեկ քաղաքական ուժը,- որքան էլ ինքն իրեն համարի հզոր,- չի կարող այսօր առկա խնդիրները լուծել, և ավելին ասեմ` հսկայական ռեսուրսը, որոնք ունեն իշխանությունները վերարտադրվելու առումով` դրան հակակշռել: Դրա համար անհրաժեշտ է որոշակի մոբիլիզացիա ընդդիմադիր դաշտում: Բայց այդ մոբիլիզացիան չէր կարող տեղի ունենալ այն բանաձևով, որը մինչև հիմա կար` ով մեզ հետ չի` մեր դեմ է, ավելին` տականք է… Տարբեր պիտակներ տալով՝ հնարավորություն չի լինում համագործակցել: Հիմա այս մոտեցումը կարծես թե փոխվել է, ավելի իրատեսական գնահատումներ եմ ես այս դաշտում տեսնում:
Ավելին ասեմ՝ այն բոլոր առաջարկները, որոնք այսօր իշխանափոխության բովանդակության հետ կարող են կապվել` այդ առաջարկությունները մենք վաղուց հրապարակում ասել ենք. օրինակ՝ ընտրությունները դարձնենք միջոց իշխանափոխության համար, որ սա ամենաանվտանգ ճանապարհն է և սրանից չի կարելի խուսափել… Հիմա նրանք խոսում են դրա մասին: «Քվեն ուժ է» շարժման հիմնական իմաստը դա էր` դարձնել ընտրությունները իշխանության պահպանման միջոցից իշխանափոխության միջոց: Այս խնդիրը պետք է լուծվի», հայտարարեց Ա. Ռուստամյանը: