Թուրքական Vatan թերթի տրամադրության տակ է հայտնվել մի աղմկահարույց փաստաթուղթ, ըստ որի՝ Թուրքիան երկրի հարավարևելյան հատվածում ընկած Հաթայի նահանգը (Ալեքսանդրետի սանջակ), որը Սիրիան ցայժմ համարում է իրենը, Ֆրանսիայից գնել է 7 միլիոն ֆրանկով։
Նշվում է, որ Առաջին համաշխարհային պատերազմից հետո Հաթայը հանձնվել է Ֆրանսիայի մանդատին, որն էլ 1939 թվականին այն 7 միլիոն ֆրանկով վաճառել է Թուրքիային։ Այս համաձայնագրի տակ իրենց ստորագրությունն են դրել Թուրքիայի տվյալ ժամանակվա նախագահ Իսմեթ Ինյոնյուն, վարչապետ Ռեֆիք Սայդամը և կառավարության բոլոր անդամները։
Հիշեցնենք, որ 1937 թվականին Ալեքսանդրետի սանջակի 240,000-անոց բնակչությունից 120,000-ը արաբներ էին, 43,000-ը հայեր, իսկ մնացածը՝ թուրքեր, թուրքմեններ, քրդեր ու չերքեզներ։