Հայաստանի Հանրապետության արտաքին գործերի նախարարության մամուլի, տեղեկատվության և հասարակայնության հետ կապի վարչությունն «Առաջին լրատվական»–ին տեղեկացնում է, որ նոյեմբերի 28-ին ԱԳ նախարար Էդվարդ Նալբանդյանն ընդունել է Հարավային Կովկասի և Վրաստանի ճգնաժամի հարցերով Եվրամիության հատուկ ներկայացուցիչ Ֆիլիպ Լեֆորին:
Հանդիպմանը զրուցակիցները քննարկել են Հայաստան-ԵՄ համագործակցությանն առնչվող հարցերի լայն շրջանակ` մասնավորապես անդրադարձել են արտաքին գործերի և անվտանգության հարցերով ԵՄ բարձր ներկայացուցիչ Քեթրին Էշթոնի Հայաստան այցելության և անցյալ շաբաթ Բրյուսելում տեղի ունեցած Հայաստան–Եվրոպական միություն համագործակցության խորհրդի նիստի արդյունքներին:
Էդվարդ Նալբանդյանն ու Ֆիլիպ Լեֆորը հանգամանալից քննարկել են արցախյան հիմնախնդրի կարգավորման գործընթացը:
Բանակցությունների օրակարգում եղել են նաև հակամարտության կողմերի միջև վստահության միջոցների ամրապնդման հետ կապված հարցեր: Այս առումով նախարար Նալբանդյանը ԵՄ հատուկ ներկայացուցչի ուշադրությունը հրավիրել է Ադրբեջանում պետական մակարդակով իրականացվող հակահայկական և ռասայական խտրականության քարոզչության վրա:
