Այսօր ՀՀ էկոնոմիկայի նախարար Տիգրան Դավթյանը Հայաստանի զբոսաշրջության ոլորտի միությունների ղեկավարների և տուրօպերատորների ընկերությունների սակավաթիվ ներկայացուցիչների հետ քննարկեց զբոսաշրջության բնագավառի ներկա իրավիճակն ու հեռանկարները, ներկայացվեցին 2012 թ. իրականացվելիք ծրագրերը:
«Միջազգային զբոսաշրջիկին Հայաստան ներգրավելու համար պետք է անել շատ բան, նախևառաջ ստեղծել ենթակառուցվածքներ՝ օդանավակայաններ, ճանապարհներ, հյուրանոցներ: Վերջին տարիներին ակնհայտ է, որ բավական լուրջ տեղաշարժ կա այդ ուղղությամբ, ունենք լավագույն օդանավակայանը տարածաշրջանում, հյուրանոցային լավ ենթակառուցվածքներ, համաշխարհային 3 բրենդային ցանցեր են ներկայացված այստեղ, ևս մի քանիսի հետ բանակցություններ ենք վարում»,- ասաց նախարարը՝ նշելով, որ պետք է կրկնապատկել ջանքերը:
Ըստ Տ. Դավթյանի` տուրիզմը տնտեսության լուրջ ոլորտ է և կարող է բավականին լուրջ եկամուտներ ապահովել: Նրա խոսքով` այս տարի զբոսաշրջության ոլորտում դրական զարգացումներ կան, 10 ամիսների ընթացքում 13.5% աճ է գրանցվել, տարեկան կտրվածքով այն կավելանա ու կհասնի 800 հազար զբոսաշրջիկի, իսկ միտումները պահպանվելու դեպքում 2-3 տարվա ընթացքում կհատենք 1 մլնի սահմանագիծը:
Նախարարը նկատեց, որ բյուջեից ուղղակի հատկացումներ են արվում միայն երկու ոլորտի՝ ՏՏ և զբոսաշրջության: