2011թ. նոյեմբերի 29-ին, երեքշաբթի, ժամը 12:00-ին Շենգավիթի վարչական շրջանի ընդհանուր իրավասության դատարանում տեղի կունենա ՀՀ ԶՈՒ պայմանագրային զինծառայող, լեյտենանտ Արտակ Նազարյանի սպանության գործով հերթական դատական նիստը, որի ընթացքում իր ցուցմունքը կշարունակի տուժողի իրավահաջորդը՝ Արտակ Նազարյանի մայրը՝ Հասմիկ Հովհաննիսյանը:
Այդ օրը դատարանում կհետազոտվի նաև նախորդ նիստի ժամանակ Հ. Հովհաննիսյանի կողմից դատարանին տրամադրված լուսանկարը դեպքի վայրից, որն արվել էր բջջային հեռախոսով և փոխանցվել Արտակ Նազարյանի հարազատներին հենց դեպքի օրը:
Արտակ Նազարյանի մորը լսելուց հետո հարցաքննվելու են գործով դատակոչված վկաները, այն է՝ Նազարյանի մարտական վերջին հերթապահության ծառայակիցները:
Դատական նիստ է նախատեսվում նաև հաջորդ օրը՝ նոյեմբերի 30-ին:
Հիշեցնենք, որ Արտակ Նազարյանը սպանվել է 2010թ. հուլիսի 27-ին, ծառայության վայրում՝ Տավուշի մարզի Բերդի տարածաշրջանի Չինարի գյուղից ոչ հեռու տեղակայված «Մեհրաբներ» զորամասի հսկողությանը հանձնված մարտական հենակետերից մեկում («Ղոզլու»), որի ավագն էր: