Նախատեսված է, որ Կարապի լճի տարածքում գտնվող սահադաշտը այս տարի կսկսի գործել, ամենայն հավանականությամբ, դեկտեմբերի 1-ից: «Առաջին լրատվական»-ի հետ զրույցում այս մասին հայտնեց Երևանի քաղաքապետարանի լրատվության վարչության պետ Արթուր Գևորգյանը:
«Սահադաշտը կզբաղեցնի նույն մակերեսը, ինչ որ նախորդ տարիներին, սակայն եղանակային կանխատեսումներով պայմանավորված՝ ակնկալում ենք, որ այցելուների թիվը, անցած տարվա համեմատությամբ, զգալիորեն մեծ կլինի: 2010-ին սահադաշտն աշխատեց մոտ 40 օր, տաք եղանակի պատճառով սառույցն անընդհատ հալվում էր, սակայն այս տարի օդերևութաբանները ցուրտ դեկտեմբեր և առավել ցուրտ հունվար են կանխատեսում: Ըստ այդմ՝ կանխատեսում ենք, որ ձմեռվա ամիսներին սահադաշտ կայցելի մինչև 15 հազար մարդ»,- նկատեց Արթուր Գևորգյանը:
Նա նաև տեղեկացրեց, որ սահելու հաճույքից օգտվելու համար այցելուները վճարելու են նույն գումարը, ինչ անցած տարի: «Եթե չմուշկները տրամադրվում են տեղում, ապա սահելու 1 ժամի արժեքը կազմում է 1000 դրամ, եթե այցելուն դրանք իր հետ է բերում՝ 500 դրամ: Ինչ վերաբերում է սահադաշտի աշխատանքային գրաֆիկին, ապա այն ցանկացողների համար բաց կլինի ժամը 11:00-ից 16:30-ը, այնուհետև՝ մինչև 18:00-ը սառույցը մշակելու համար դադար կտրվի: Այցելուները կրկին սահել կարող են 18:00-ից մինչև 23:00-ն»,- ամփոփեց Երևանի քաղաքապետարանի լրատվության վարչության պետը:
