Նոյեմբերի 28-ին Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի հրավերով Երևանում, Կ. Դեմիրճյանի անվան մարզահամերգային համալիրում, գումարվել է ԱՊՀ Միջկրոնական խորհրդի նախագահության նիստը: Այս մասին «Առաջին լրատվական»-ին տեղեկացնում են Մայր աթոռի մամլո դիվանից:
Ժողովի առիթով նոյեմբերի 28-ի առավոտյան Հայաստան են ժամանել ԱՊՀ Միջկրոնական խորհրդի համաատենապետներ Նորին Սրբություն Կիրիլ Ա Մոսկվայի և Համայն Ռուսիո Պատրիարքը և Կովկասի մահմեդականների վարչության նախագահ Շեյխ-ուլ-Իսլամ Ալլահշուքյուր Փաշա Զադեն: Ժողովին մասնակցել են ԱՊՀ երկրների ավանդական կրոնների (քրիստոնեություն, իսլամ, հուդայականություն, բուդդիզմ) շուրջ երեք տասնյակ առաջնորդներ ու ներկայացուցիչներ:
Ժողովը բացվել է Մոսկվայի և Համայն Ռուսիո Պատրիարք Նորին Սրբություն Կիրիլ Ա-ի ողջույնի խոսքով: Այնուհետև ներկաներին իր ողջույնի խոսքն է հղել Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսը: Ժողովականներին ողջունել է նաև Հայաստանի Հանրապետության նախագահ Սերժ Սարգսյանը, ապա ընթերցվել ՌԴ նախագահ Դիմիտրի Մեդվեդևի ուղերձը:
