Այսօր՝ Աժ շենքի առջև արտահերթ նիստից առաջ տեղի ունեցավ բնապահպանական ակցիա` հանուն բնության պահպանության: Բնապահպանության նախարարությունը հերթական անակնկալն է մատուցել բնասեր հասարակությանը. առանց հանրային լսումներ անցկացնելու՝ նախարարությունը օրենքի նախագիծ է ուղարկել Աժ արտահերթ նիստի քննարկման. «Շրջակա միջավայրի փորձաքննության մասին ՀՀ օրենքում փոփոխություններ և լրացումներ կատարելու մասին» օրենքի նախագիծը:
«Առաջին լրատվական»-ի հետ զրույցում բնապահպանության փորձագետ Արման Վերմիշյանի հավաստմամբ՝ առաջարկվող փոփոխություններում կան դրույթներ, որոնք հակասում են պետության, հասարակության, մասնավոր սեկտորի շահերին: Ըստ նրա` շատ անմշակ օրենքի նախագիծ է, և այդ վիճակում պարզապես չի կարելի թույլ տալ, որ օրենքը մտնի Աժ քննարկման:
Արման Վերմիշյանը նշեց, որ Բնապահպանության նախարարության հետ համագործակցելու վերաբերյալ նախնական պայմանավորվածություն է եղել, սակայն նախարարությունը հերթական անգամ շրջանցել է բնասերներին` հաշվի չառնելով նրանց պատրաստած առաջարկներն ու բողոքները: «Առանց մեզ հետ քննարկումների՝ նրանք միանգամից օրինագիծն ուղարկել են Աժ քննարկման: Սա ոչ ճիշտ գործընկերային հարաբերություններ են՝ մի բան պայմանավորվել, մեկ այլ բան անել»,- դժգոհություն հայտնեց բնապահպանության փորձագետը:
Անդրադառնալով օրենքի նախագծին` նա նշեց, որ այն մեխանիզմը, որով որ դա պետք է դառնա փորձաքննություն, բացակայում է: Մասնավորապես ասաց, որ 2008 թվականից պայքարում են, որպեսզի վնասները տնտեսապես գնահատվեն, նույնիսկ դրա սևագիր տարբերակը մաշկվել էր բնապահպանության նախարարությունում, սակայն մինչև հիմա ընդդիմանում են և թույլ չեն տալիս, որ այդ կարգը հաստատվի: «Եթե չընդունվեն մեր առաջարկները, փորձաքննություն ասվածը շատ հարաբերական կլինի»,- ընդգծեց Ա. Վերմիշյանը` ավելացնելով, որ նախագծում բացակայում են հանրային լսումները, տնտեսական գնահատականը և չկա նշված, թե ինչ է սահմանվում սխալ եզրակացություն կազմելու համար: