Վրացական GHN լրատվական գործակալության փոխանցմամբ՝ Հայաստանի նախագահ Սերժ Սարգսյանը վաղը երկօրյա պաշտոնական այցով ժամանելու է Վրաստան։ Այս կապակցությամբ Վրաստանի փոխարտգործնախարար Նինո Կալանդաձեն այսօր տեղի ունեցած ավանդական ճեպազրույցի ժամանակ հայտարարել է, որ դա լինելու է Վրաստանի նախագահի տարեսկզբյան հայկական այցի պատասխանը.
«Սարգսյանի վրացական այցի ընթացքում պլանավորված է թե՛ երկկողմանի, թե՛ բազմակողմ այժմեական հարցերի դիտարկում։ Պլանավորված է մի շարք իրավական փաստաթղթերի ստորագրում։ Ստորագրվելու են մի շարք համաձայնագրեր, որոնք առնչվում են նաև սահմանային համագործակցությանն ու սպորտային ոլորտին։ Բացի այդ, պլանավորված է, որ երկու երկրների ԱԳՆ-երի միջև ստորագրվելու է համագործակցության մասին արձանագրություն։
Վրացական կողմը ողջունում է այդ այցը։ Մենք հուսով ենք, որ այդ այցն էլ ավելի կամրագրի մեր ամուր հարաբերությունները։ Պաշտոնական այցի շրջանակներում պլանավորված են մի շարք մշակութային միջոցառումներ, որոնց մասնակցելու է նաև հայկական պատվիրակությունը»։
