«Մոտավորապես մեկ ամսից կլրանա ՀՀ քաղաքացիական ծառայության խորհրդի տասնամյակը. այս տասը տարիների մեր գործողությունները միշտ եղել են ապագային միտված»,- այսօր կայացած մամուլի ասուլիսում հայտարարեց ՀՀ քաղաքացիական ծառայության խորհրդի նախագահ Մանվել Բադալյանը:
«Նոր խնդիրներ կան, որոնք պետք է վեր հանել և փորձել լուծումներ գտնել»,- նկատեց նա` հավելելով, թե սա այն ոլորտն է, որը մշտական զարգացման կարիք ունի:
Բադալյանի խոսքով` քաղաքացիական հասարակությունը Հայաստանում դեռևս այնքան էլ զարգացած չէ:
«Քաղաքացիական ծառայության մասին նոր օրենքով գնահատման մոդելը փոխվել է, և հաղթողներն այլևս որոշվում են բալային համակարգով: Սահմանափակումներ են դրվել նաև հաղթողների թվի առումով` առավելագույնը 3 հոգի: Հարցերն արձանագրվում են, ձայնագրվում, և յուրաքանչյուր հարց գնահատվում է 10 բալանոց համակարգով: Նոր կարգն առավել օբյեկտիվ գնահատման հնարավորություններ է ընձեռում»,- նկատեց Մանվել Բադալյանը:
ՀՀ քաղաքացիական ծառայության խորհրդի նախագահը նշեց նաև` եթե քաղծառայողը ցուցաբերում է քաղաքացիական ակտիվություն և հանկարծ ղեկավարի գործողությունների արդյունքում սեփական դիմումի համաձայն հեռանում աշխատանքից, ապա նրա հետևից գնալու ցանկություն չունի:
«Ես ձեռք կմեկնեմ այն մարդուն, ով պատրաստ է գոնե հիսուն տոկոսով պաշտպանել իրեն և իր գործը: Միաժամանակ, աշխատանքից հեռացման մասին մեր կողմից քննված միջնորդությունների կեսը մերժվել է: Եթե մարդն իր աշխատանքում անխոցելի է և անթերի, ոչ մի նախարար չի կարող նրան ազատել աշխատանքից:
Ինչ վերաբերում է պետական չինովնիկների աշխատավարձերին, ապա ես միշտ ասել եմ, որ դրանք շատ ցածր են` նրանց կատարած աշխատանքի հետ համեմատած:
Բացի այդ, պետական ծառայողների շարքերն առողջ չեն. մենք դա լավ գիտենք, այդ է պատճառը, որ պետական ծառայության համակարգի աշխատակիցներին պետք է հասկացնենք, որ պետական ծառայությունը բիզնես չէ, ինչպես նրանցից շատերն են կարծում»,- ասաց Մանվել Բադալյանը` հիշեցնելով, որ 2012-ի բյուջեով քաղծառայողներին ամսական 15 հազար դրամ վճար է տրվելու, որը նրանք կարող են ծախսել Հայաստանում կամ ԼՂՀ-ում հանգիստը կազմակերպելու, սեփական առողջության պահպանման և այլ կարիքների վրա:
Ամփոփելով` ՀՀ քաղաքացիական ծառայության խորհրդի նախագահը տեղեկացրեց, որ 5 մրցույթներից մեկում, որպես կանոն, հաղթող չի լինում, ինչը խոսում է քննություններին մասնակցող մարդկանց ոչ այնքան ուժեղ որակներ ունենալու մասին:
