«Ժողովուրդ» օրաթերթի խմբագրությունը ընդամենը մեկ անգամ մասնակցելով ՀՀ Գեղարքունիքի մարզպետ Նվեր Պողոսյանի ներկայացրած հայցի քննությանը` ընդդեմ «Ժողովուրդ» օրաթերթի, արձանագրեց, որ անգամ մարզպետի փաստաբանները չգիտեն` Պողոսյանը կաշառք վերցրել է, թե ոչ: Նրանք փոխարենը հայտարարեցին, որ «Մարզպետը կաշառք է վերցրել» վերնագրով հոդվածը օրաթերթն իրավունք չուներ գրելու, քանի որ «մարզպետը հանրային անձ է»:
Այսպիսով, «Ժողովուրդ»-ը եկել է այն եզրակացության, որ ԲՀԿ-ական մարզպետը չարաշահել է իր իրավունքները: Նա դատարանում վիճարկվող հոդվածը տպագրելուց հետո, մեկամսյա ժամկետում «Ժողովուրդ»-ին հերքման պահանջ չի ներկայացրել, (որը ներկայացնելու դեպքում կտպագրվեր): Սա նշանակում է, որ մարզպետն իրականում խնդիր է դրել օրաթերթից ստանալ 2.մլն դրամի փոխհատուցում (և 500 հազար դրամ` փաստաբանական ծախսեր)` «Ժողովուրդ»-ին ֆինանսական վնաս պատճառելու համար: Հայցվորն իր գործողություններով ցանկանում է նաև սահմանափակել օրաթերթի` տեղեկատվություն տարածելու իրավունքն ու ազատությունը, «Ժողովուրդ»-ին հարկադրել հրաժարվելու իր և իր գործունեության վերաբերյալ բացասական ինֆորմացիա տպագրելու և կարծիք արտահայտելու իրավունքներից:
Այս գործողություններով, ինչպես նաև իր հրապարակային արտահայտություններով Նվեր Պողոսյանը վիրավորել և զրպարտել է «Ժողովուրդ» օրաթերթի աշխատակազմին, քանի որ օրաթերթն իր գործունեությունն իրականացնելիս ղեկավարվել և ղեկավարվում է ՀՀ Սահմանադրության 27 և 42.1 հոդվածների, «Զանգվածային լրատվության մասին» ՀՀ օրենքի 4 հոդվածի 1-ին կետի և 9 հոդ¬վածի 2-րդ կետի պահանջներով: Օրաթերթն իրականացրել և իրականացնում է մասնագիտական օրինական գործունեություն` մասնավորապես, վիճահարույց հոդվածում բառացի վերարտադրելով ինչպես Աննա Թորոսյանի, այնպես էլ Նվեր Պողոսյանի խոսքերը:
Այսպիսով, հիմք ընդունելով ՀՀ քաղաքացիական օրենսգրքի 1087.1 հոդվածի 7-րդ կետի 3-րդ ենթակետի, 8-րդ կետի 2-րդ ենթակետի պահանջները, «Ժողովուրդ»-ը Նվեր Պողոսյանից պահանջում է ընդամենը 1 (մեկ) լումա: Իսկ դատական ծախսերը չի պահանջում, քանի որ դատարան դիմելով ոչ թե ցանկանում է Նվեր Պողոսյանից գումար ստանալ, այլ պաշտպանել «Ժողովուրդ»-ի (խմբագրի և աշխատակազմի) պատիվը, արժանապատվությունը և գործարար համբավը: Դատարանը հակընդդեմ հայցի շրջանակներում պետք է քննի և պարտադրի ԲՀԿ-ական մարզպետին տպագրելու հետևյալ տեքստը. «Ես` Նվեր Պողոսյանս, ներողություն եմ խնդրում «Ժողովուրդ» օրաթերթի խմբագիր Թագուհի Թովմասյանից և աշխատակազմից` նրանց պատիվը, արժանապատվությունը և գործարար համբավն արատավորելու (վիրավորելու և զրպարտելու) համար»:
Վաղը ժամը 11-ին Կենտրոն և Նորք-Մարաշ վարչական շրջանների ընդհանուր իրավասության դատարանում (դատավոր Ռուբեն Ափինյան), կքննվի «Ժողովուրդ»-ի դեմ ՀՀ Պաշտպանության նախարարի խորհրդական Բենիկ Հարությունյանի ներկայացրած դատական հայցը: Հարությունյանը օրաթերթից պահանջում է 2 մլն դրամ: