Թուրքական Anadolu գործակալության փոխանցմամբ՝ «Դեղիշիմ» հրատարակչության աջակցությամբ և Սաքարիայի համալսարանի դասախոս ու թուրքական պատմագիտական ընկերության (TTK) հայկական բաժնի պատասխանատու, դոկտոր, պրոֆեսոր Էնիս Շահինի խմբագրությամբ լույս է տեսել հայ-թուրքական ամբողջական հարաբերություններին նվիրված 24 հատորանոց մի հանրագիտարան։
Դրանում տեղ են գտել նաև հայ, ադրբեջանցի, ֆրանսիացի, անգլիացի, ռուս և ամերիկացի հեղինակների 361 ակադեմիական աշխատությունները։ Այն պատրաստվել է 5 տարում, բաղկացած է 17,000 էջից ու 80,000 փաստաթղթից և նվիրված է հայ-թուրքական շուրջ հազարամյա պատմությանը (սելջուկյան ժամանակներից սկսած)։
Հանրագիտարանը շուկայում կհայտնվի 2012 թվականի ապրիլին։ Մինչև 2015 թվականը (Հայոց ցեղասպանության 100-րդ տարելիցը) այս հանրագիտարանը թարգմանվելու է անգլերեն և այլ լեզուներով։
«Դեղիշիմ» հրատարակչության սեփականատեր Իսմաիլ Այդընը նշել է, որ սա աննախադեպ աշխատություն է, որում նշված է, թե ինչպես են տարբեր ռասա ու տարբեր կրոն ունեցող երկու ժողովուրդներ հազար տարի գոյակցել միմյանց հետ. «Դրա առաջին օրինակը սելջուկյանների ժամանակ թողարկված դրամն է, որի մի կողմում պատկերված է Հայոց թագավորության, իսկ մյուս կողմում՝ սելջուկների խորհրդանիշը»։