Վենեսուելայի նախագահ Ուգո Չավեսը դեմ է, որ իր պատվին հուշարձաններ կանգնեցվեն:
Ինչպես հաղորդում է ИТАР-ТАСС-ը, կիրակի օրը, մեկնաբանելով այն հայտարարությունը, որ Վենեսուելայի Կորո քաղաքում իր կիսանդրին են տեղադրել Կուբայի հեղափոխության առաջնորդ Ֆիդել Կաստրոյի կիսանդրու կողքին, նա հայտարարել է. «Ինձ դուր չի գալիս, որ իմ պատվին հուշարձաններ են կանցնեցվում, և որքան գիտեմ, Ֆիդելին էլ դա դուր չի գալիս»:
Չավեսի խոսքերով՝ շատ ավելի լավ կլիներ, եթե կանգնեցվեին Վենեսուելան իսպանական գաղութային լծից ազատագրող Սիմոն Բոլիվարի և հայտնի կուբացի մտածող և հեղափոխական Խոսե Մարտիի արձանները:
«Իսկ ինձ բավարար է, որ պահպանեք ինձ ձեր սրտերում»,- ասել է նախագահը՝ հիշեցնելով, որ անցյալ տարի ինքը հրաման է ստորագրել՝ արգելելով քաղաքական և հասարակական կազմակերպություններին օգտագործել իր անունը և կերպարը:
