BBC-ի ռուսական ծառայության փոխանցմամբ՝ Իրանի խորհրդարանը քվեարկել է Մեծ Բրիտանիայի հետ դիվանագիտական ու տնտեսական հարաբերությունների մակարդակը նվազեցնելու օգտին։ Խոսքը դրանք ժամանակավոր հավատարմատարի մակարդակի իջեցնելու մասին է։
Այս նախաձեռնությունը դարձավ իրանական կողմի պատասխանը նրա նկատմամբ Մեծ Բրիտանիայի, ինչպես նաև ԱՄՆ-ի ու Կանադայի սահմանած պատժամիջոցներին։
Իրանի խորհրդարանի այս որոշումն ուժի մեջ է մտնելու Իսլամական հեղափոխության պահակազորի կողմից հավանության արժանանալուց հետո։ Եթե դա տեղի ունենա, Իրանը բրիտանական դեսպանից կարող է պահանջել լքել երկիրը։
Իրանական ռադիոն հաղորդել է, որ քվեարկության ժամանակ պատգամավորները բացականչել են «Մա՛հ Բրիտանիային»։
Հիշեցնենք, որ այս տարվա նոյեմբերի 21-ին Մեծ Բրիտանիան հավելյալ պատժամիջոցներ էր սահմանել Իրանի նկատմամբ, որոնցով կասեցվում էր Իրանի հետ երկրի ֆինանսական ու վարկային հաստատությունների ամեն տիպի գործարար կապեր ունենալը։
Նոր պատժամիջոցների համաձայն՝ բրիտանական բանկերը պարտավորվում են սառեցնել իրենց իրանական գործընկերների, ներառյալ Իրանի Կենտրոնական բանկի հետ ամեն տիպի օպերացիաները։ Նշվում է, որ որևէ երկրի բանկերի հետ հարաբերությունների խզման մասին որոշումն աննախադեպ է բրիտանական իշխանությունների համար։