«Շիրակ կենտրոն» ՀԿ–ն այսօր տարածել է հաղորդագրություն, որում ասվում է, որ ՀՀ կառավարության աղետի գոտում բնակբաշխման կարգը սահմանող որոշման մեջ այս տարի աշնանը կատարած մի փոփոխության համաձայն՝ անօթևան ընտանիքներից բնակարաններ ստանալու նպատակով փաստաթղթերի ընդունման վերջնաժամկետ է սահմանվել 2011 թ. նոյեմբերի 1-ը:
Ըստ ՀԿ–ի՝ այս պահի դրությամբ Գյումրիի անօթևանների հերթացուցակում հաշվառված 3214 ընտանիքների կողմից բնակբաշխման հանձնաժողովին հանձնված գործերից 88-ը թերի են, 388-ը առհասարակ փաստաթղթեր չեն ներկայացրել, իսկ 294 ընտանիքներ էլ բնակբաշխման այս փուլում ենթակա չեն բնակարանային փոխհատուցման՝ այն պատճառաբանությամբ, որ այդ ընտանիքները երկրաշարժի ժամանակ կորցրել են կամ սեփական տներ, կամ նրանց ընտանիքների անդամներից ոմանք նախկինում բնակարաններով ապահովվել են՝ հաշվի առնելով կորցրած սենյակների թիվը:
«Շիրակ կենտրոնի» հավաստիացմամբ՝ թեև իրենք ընդհանուր առմամբ տեղյակ են անօթևան ընտանիքների կողմից փաստաթղթեր չներկայացնելու հիմնական դրդապատճառներին, այնուամենայնիվ, որոշել են այցելել այդ ընտանիքներին և տեղում ուսումնասիրել խնդիրը:
ՀԿ–ն ներկայացնում է տվյալներ, օրինակ, Գյումրիի կենտրոնական հատվածում` Գարեգին Նժդեհի փողոցի սկզբնամասում գտնվող կիսաքանդ հանրակացարաններից մեկի առաջին հարկում բնակվող 1-ին կարգի հաշմանդամ Աստղիկ Աղեկյանի ընտանիքի մասին. «Նրանք չեն կարողացել ամբողջովին համալրել իրենց 15 անձից բաղկացած ընտանիքի բոլոր անդամների փաստաթղթերը, ինչի պատճառով չեն օգտվելու բնակարանային փոխհատուցման իրենց իրավունքից: Իսկ այդ` նախկին հանրակացարանի շենքը, որտեղ նրանք ապրում են երկրաշարժից անմիջապես հետո, վաղուց վաճառվել է, և սեփականատերը պարտադրում է օր առաջ ազատել այն»:
Խնդիրն այն է, որ երկրաշարժից հետո՝ անցած 23 տարիների ընթացքում շատ անօթևան ընտանիքների ներսում ձևավորվել են մեկից մինչև մի քանի նոր ընտանիքներ, որոնք սակայն, գործող կարգի համաձայն, միասին ստանալու են մեկ բնակարան, բաղկացած այնքան սենյակներից, որքան նախկին մեկ ամբողջական ընտանիքը կորցրել է երկրաշարժի ժամանակ: «Իսկ շատ ընտանիքներում անդամների միջև կա անհամաձայնություն ստանալիք բնակարանի ապագա պատկանելիության վերաբերյալ, և մի մասը հրաժարվում է տրամադրել իրենց անձնական փաստաթղթերը, ինչի պատճառով հնարավոր չի լինում ամբողջացնել պահանջվող փաստաթղթերի փաթեթը և դիմել բնակբաշխման հանձնաժողովին»,– ասված է հաղորդագրության մեջ:
