Մառնեուլի շրջանի հայերը հեռանում են հողի բարձր հարկի պատճառով:
Նոյեմբերի 29-30-ին նախատեսվում է ՀՀ նախագահ Սերժ Սարգսյանի այցը Վրաստան` երկու երկրների բարեկամական հարաբերությունների բարելավման մասին պայմանագրեր ստորագրելու համար:
Այս անգամ Վրաստանի հայկական համայնքը կբարձրացնի Մառնեուլի հայերի հիմնախնդիրը: Մառնեուլի էթնիկ կազմը 2002 թվականի մարդահամարի տվյալներով հետևյալ տեսքն ունի. ադրբեջանցիներ` 98 հազար, վրացիներ` 9500, հայեր` 9320 մարդ:
Ինչպես գրում է Times.am-ը, տեղացի հայերի ապրուստի հիմնական միջոցը հողագործությունն է: Սակայն վերջին շրջանում հողագործությունն իրեն չի արդարացնում, և հողագործները ներդրած գումարը չեն կարողանում վերադարձնել: Արդյունքում հայերի 80%-ը բանկերին պարտք է: Վիճակն ավելի է բարդացնում այն հանգամանքը, որ Մառնեուլի շրջանի տարբեր հատվածներում հողի հարկը այսուհետ հավասարաչափ է բաշխվելու` անկախ հողի բերքատվության աստիճանից: Այսուհետ մարդիկ ստիպված են լինելու վճարել 3 անգամ ավելի:
Խնդիրն այն է, որ տեղացի չինովնիկների ու ադրբեջանցիների հողի հարկերը չնչին չափով են բարձրացել, մինչդեռ ցանկանում են բյուջեն ավելացնել ոչ բերրի հայկական հողերից ստացվող հարկերից: Տեղի հայերի արտագաղթի հիմնական պատճառներից մեկը սա է: Մյուս պատճառը Մառնեուլի շրջանի, Հայաստանի ու Ադրբեջանի սահմանների հետ կապված խնդիրն է: