ԱՄՆ-ի` Ադրբեջանում այլընտրանքային ուժի փնտրտուքներին տեղեկացած ադրբեջանական իշխանությունը սկսել է կրոնական արմատականության պատկեր ստեղծելու ուղղությամբ ծրագրեր իրագործել երկրում, այս մասին «Ենի Մուսավաթ»-ին տեղեկություններ են հասել, համաձայն որոնց` WikiLeaks-ի ստեղծած աղմուկից շոկի մեջ հայտնված Ադրբեջանի իշխանությունը օրակարգ է բերել հիջաբի (գլխաշոր) արգելքը դպրոցներում` երկրում իսլամի գործոնը ուժեղանալու տպավորություն ստեղծելու համար:
Ըստ Թերթի` «WikiLeaks»-ի հրապարկումները ցույց են տալիս, որ աշխարհի մեծ մասում լուրջ հետաքրքրություններ ունեցող ԱՄՆ-ը, իրականում, վաղուց չի հավատում Ադրբեջանի նման ոչ դեմոկրատական երկրների իշխանություններին, տեղյակ է նրանց երկակի խաղերին և դոսյեներ է հավաքել այդ իշխանությունների դեմ: Այդ փաստաթղթերից պարզ է դարձել նաև, որ վերջին տարիներին Ադրբեջանի իշխանությունը ԱՄՆ-ի առաջ հանդես է եկել հիմնականում Իրանի խաղաքարտով և իսլամի գործոնով: Ուստի «WikiLeaks»-ի աղմուկից հետո իշխանությունը սկսել է ուռճացնել այդ հարցերը և փորձում է օգտվել դրանից` Արևմուտքին սպառնալով իսլամով: «Դեմոկրատիայի, Ղարաբաղի հարցում, Իրանի հետ կապված ԱՄՆ-ի ծրագրերի իրագործման մեջ Արևմուտքի առաջ վստահությունը և հեղինակությունը կորցրած Ադրբեջանի իշխանության ներսում մի այնպիսի հստակ համոզմունք կա, որ ներկայիս հանգամանքներում, առանց ժամանակ կորցնելու, ԱՄՆ-ը ձեռնամուխ է եղել այլընտրանք որոնելու: Այդ որոնումները կարող են բերել որոշակի ուժերի ակտիվանալուն, «WikiLeaks»-ի միջոցով ավելի սարսափելի գաղտնիքների բացահայտմանը, իշխանության ներսում ճաքերի և իշխանության կորստի: Այդ պատճառով էլ այժմ իշխանության առաջ մեկ ճանապարհ կա, որը Ադրբեջանում և ամբողջ տարածաշրջանում Արևմուտքի կենսական շահերին կտրականապես հակասող այլ այլընտրանքային ուժերի ի հայտ գալու պատկեր ստեղծելն է և դիմելն է Արևմուտքին` այդ ուժերի դեմ համատեղ պայքար տանելու համար»: «Ենի Մուսավաթ»-ի տեղեկություններով, վերջին մեկ ամսվա ընթացքում Բաքվում հավատացյալների հետ տեղի ունեցող բախումների, հիջաբի արգելքի թեման օրակարգ մտնելու հետևում հենց այդ հարցն է:
