Իսրայելը մտադրություն չի ունեցել ներողություն խնդրել Թուրքիայից: Այս մասին հաղորդում է իսրայելական Haaretz թերթը` մեջբերելով այդ երկրի փոխարտգործնախարար Դանի Այալոնի խոսքերը:
«Դրանք բոլորը ասեկոսեներ են, որոնք հորինվել են ԶԼՄ-ների կողմից, սակայն մենք պատասխանատվություն չենք կրում լրագրողների հայտարարությունների համար»,- ասել է փոխարտգործնախարարը: Հիշեցնենք, որ արդեն մի քանի շաբաթ է, ինչ իսրայելական և թուրքական մամուլում հայտնվել էին տեղեկություններ, համաձայն որոնց՝ քննարկվում է Իսրայելի կողմից Թուրքիայից ներողություն խնդրելու հարցը` կապված «խաղաղության նավատորմի» վրա հարվածի ժամանակ 10 թուրքերի սպանության հետ:
Ավելի վաղ Թուրքիայի վարչապետը հայտարարել էր, թե Իսրայելը նաև գումարային փոխհատուցում պետք է տրամադրի սպանվածների ընտանիքներին:
Վերջին շրջանում տեղեկություններ եղան նաև, թե բանակցություններ են ընթանում իսրայելցի և թուրք բարձրաստիճան պաշտոնյաների միջև:
Շատ թերթեր էլ Իսրայելում բռնկված անտառային հրդեհների մարման աշխատանքներին թուրք փրկարարների մասնակցությունն անվանեցին ջերմացման նոր փուլ երկկողմ հարաբերութոյւններում:
Սակայն, ինչպես տեսնում ենք, ամեն ինչ շատ հեռու է կարգավորված համարվելուց: