«Ազադլըգ» ընդդիմադիր թերթի` azadlig.info ինտերնետային կայքը դեկտեմբերի 9-ից խափանված է: Կայքի խմբագիր Ալի Ռզան նշել է, որ թեեւ դեկտեմբերի 12-ին իրենց հաջողվել է վերականգնել կայքի գործունեությունը նոր սերվերում, սակայն, կարճ ժամանակ հետո կրկին խոչընդոտվել է նրա աշխատանքը: Ալի Ռզան կայքի գործունեությանն ուղղված խոչընդոտները դիվերսիա է որակել: «Այն փաստը, որ Ադրբեջանի իշխանությանը քննադատող կայքերը խափանվում են, կամ էլ երկրի տարածքում խոչընդոտվում է մուտքն այդ կայքեր, հաստատում է այդ կասկածը: Ադրբեջանում ոչ մի կայք ապահովագրված չէ նման դիվերսիաներից», -ասել է նա: Turan լրատվական գործակալության տնօրեն Մեհման Ալիեւն էլ հավելել է, որ վարչակարգին քննադատող կայքերի գործունեությունը կողմնակի միջամտություններով սահմանափակվում է իշխանության հատուկ հանձնարարությամբ: «Սա Ադրբեջանն է, եւ իշխանությունը հետեւում է բոլոր կայքերին: Իսկ կայքերի գործունեությանը միջամտությունը նրանց համար խնդիր չէ: Ինտերնետային գրագրությունները, բլոգներն ու էջերը հատուկ ուշադրության տակ են: Գտնում եմ, որ նման միջամտությունները իշխանության ձեռքի գործն է: Հաճախ նկատում ենք, որ կայք մուտքը բարդացել է, լուրը էջից անհետացել է: Դա խոսում է այն մասին, որ կողքից միջամտությունը հնարավոր է, եւ այժմ դա մամուլի նկատմամբ վերահսկողության տեսակներից մեկն է», -ասել է Turan-ի տնօրենը:
