Գյումրիի «Շիրակ կենտրոնն» այսօր տարածել է հաղորդագրություն, որում ասվում է, թե 40-ամյա միայնակ մայր Արփենիկ Ղազարյանն իր երկու անչափահաս երեխաներից մեծին` 14-ամյա Սոնային, տվել է Գյումրիի «Թռչունյան տուն» մանկատուն և 1,5 տարեկան փոքրիկի հետ բնակվում է քաղաքի ծայրամասային թաղամասերից մեկում` Բուլվարային 206 տարածքի 025 ավտոտնակում, որն ավելի շուտ կիսագետնափոր մի խուց է հիշեցնում: Չորրորդ ամիսն է այս ընտանիքին, առանց որևէ պատճառաբանության, զրկել են իրենց գոյությունը պահպանելու միակ միջոցից` սոցիալական նպաստից:
Արփենիկը դիմել է «Շիրակ կենտրոնին» և խնդրել այցելել իրենց: Այսօր կենտրոնի ներկայացուցիչների այցելության ժամանակ պարզվել է, որ Արփենիկն ու իր փոքրիկն արդեն մի քանի օր է զրկված են նաև էլեկտրաէներգիայից: Դրսում 10 աստիճան ցրտի պայմաններում նրանք չեն վառում անգամ վառարանը՝ խնայելով իրենց միակ վառելիքը՝ մոտակա ծառերից կտրտված թաց ճյուղերը:
«Թռչունյան տուն» մանկատնից շաբաթ և կիրակի օրերին երեխաներին ծնողները կամ ազգականները սովորաբար տուն են տանում: Սակայն Արփենիկն իր երեխայի հետևից այսօր չէր գնացել, քանի որ այլևս հարևանները չէին կարողացել պարտքով գումար տալ՝ ճանապարհածախսի և սնունդի համար: Ինչպես այլ գյումրեցի աղքատության ճիրաններում հայտնված հարյուրավոր երեխաներ, այնպես էլ այս երեխաները չեն հայտնվել Շիրակի մարզպետարանի և Գյումրու քաղաքապետարանի համապատասխան բաժինների պաշտոնյաների կամ որևէ միջազգային ու տեղական բարեգործական կազմակերպությունների տեսադաշտում»,– ասվում է «Շիրակ կենտրոնի» տարածած հաղորդագրությունում։
