«Մեսիջները վատ բան չեն, եթե հատկապես ԲՀԿ-ին են ուղղված. պատճառն այն է, որ մեսիջներն ուղարկվում են միայն ուժեղներին, հասարակության շրջանում ճանաչված և հեղինակություն ունեցողներին»: «Առաջին լրատվական»-ի հետ զրույցում ասաց «Բարգավաճ Հայաստան» կուսակցության պատգամավոր Վարդան Բոստանջյանը՝ մեկնաբանելով այն դիտարկումը, որ երեկվա հանրահավաքում ՀԱԿ առաջնորդ Լևոն Տեր-Պետրոսյանը ԲՀԿ հետ հնարավոր համագործակցության առաջարկ հնչեցրեց:
Հարցին՝ արդյո՞ք ԲՀԿ-ն էլ Տեր-Պետրոսյանի ելույթի համապատասխան հատվածը նույն կերպ է ընկալել, ինչպես մնացածները, և եթե այո՝ ի՞նչ կերպ է պատրաստվում արձագանքել համագործակցության հնարավորության մասին ակնարկին՝ Վարդան Բոստանջյանը նկատեց. «Չեմ կարող առաջ ընկնել, ասել՝ ինչպես ԲՀԿ-ն կարձագանքի համագործակցության իրենց առաջարկին:
ԲՀԿ-ն արդեն իսկ երկար տարիներ համագործակցության մեջ է կոալիցիոն իր գործընկերների հետ, և չեմ կարծում, որ սկզբունքերի, նպատակների փոփոխություն լինի: Չեմ մտածում, որ ԲՀԿ-ն այն քաղաքական ուժն է, որն արագորեն կարող է որոշումներ փոփոխել և համագործակցության համար նոր գործընկեր փնտրել: Դրա համար էլ ձեռնպահ կմնամ այս խոսքը մեկնաբանելուց և կսպասեմ, թե մեր կուսակցության խորհուրդը ինչ վերաբերմունք կարտահայտի այս կապակցությամբ:
Մինչև անգամ եթե քննարկում լինի, դրա մեջ արտառոց որևէ բան չկա: Քաղաքական դաշտում ցանկացած միտք, առաջարկություն, թեկուզ հպանցիկ, կարծում եմ, հնարավոր է նաև մյուս կողմից գնահատվի, իմաստավորվի»,- ամփոփեց ԲՀԿ-ական պատգամավորը:
