Իրանահայ «Ալիք» օրաթերթը գրում է. «Շաբաթ, դեկտեմբերի 3-ին տօնն է Հայաստանեայց Առաքելական Եկեղեցու հիմնադիրներ՝ Թադէոս եւ Բարթուղիմէոս առաքեալների, որը նաեւ անւանակոչութեան տօնն է Թեհրանի հայոց առաջին` Ս. Թադէոս-Բարթուղիմէոս եկեղեցու:
Քանի որ այս տարի Թադէոս-Բարթուղիմէոս առաքեալների տօնը զուգադիպում է մոհառամի օրերին` եկեղեցու անւանակոչութեան տօնը նշւեց երէկ` ուրբաթ, նոյեմբերի 25-ի առաւօտեան` հոծ թւով ուխտաւորների մասնակցութեամբ:
Նախ Տ. Վարազդատ աւ. քահանայ Տէրտէրեանի նախագահութեամբ կատարւեց առաւօտեան ժամերգութիւն, ապա մատուցւեց եպիսկոպոսական հանդիսաւոր ս. Պատարագ` Թեհրանի հայոց թեմի առաջնորդ Տ. Սեպուհ արք. Սարգսեանի ձեռամբ, որին սպասարկում էին` Տ. Վազգէն քհնյ. Շմաւոնեանը եւ Տ. Յակոբ քհնյ. Քեշիշեանը: Պատարագի երգեցողութիւնը կատարում էր Թեհրանի Ս. Գէորգ եկեղեցու երգեցիկ խումբը` ղեկավարութեամբ եւ երգեհոնի նւագակցութեամբ Օդետ Մուրադեանի»:
